Tengrinews.KZ парақшасындағы деректерге сәйкес, Qazaq24.com ақпарат таратты..
Қазақстандық белгілі блогер, спортшы Айтым Жақыпов Астанада жол қозғалысы ережелерін бұзғаны үшін әкімшілік жауапкершілікке тартылды, деп хабарлайды Tengrinews.kz.
Бұған дейін әлеуметтік желілерде Mercedes-Benz автокөлігінің жүргізушісі бірден бірнеше ереже бұзған сәті түсірілген видео пайда болды. Жарияланым авторы оқиғаның Астанадағы LRT желісінің бойымен өтетін Қарқаралы тасжолында болғанын көрсеткен.
Автордың жазуынша, жүргізуші:
жол жиегімен жүрген; жол белгілерінің талаптарын елемеген; бұрылу сигналын қоспай маневр жасаған; апаттық жағдай туғызған; қарсы бағыттағы қозғалыс жолағына шығып кеткен.Әлеуметтік желі қолданушылары заңбұзушының кім екенін тез анықтады. Олар пікірлерде автокөліктің мемлекеттік нөмірі арқылы Айтым Жақыповты танығандарын жазды. Көп ұзамай блогердің өзі рөлде болғанын растап, болған жағдай үшін көпшіліктен кешірім сұрады.
"Шынымен де қатты асығып бара жатыр едім. Егер қолайсыздық тудырған болсам, шын жүректен кешірім сұраймын!" - деп жазды блогер.
Видео қолданушылар арасында қызу талқыға салынды. Пікір қалдырушылардың бір бөлігі жолдағы қауіпті әрекеті үшін блогерді жүргізуші куәлігінен айыру керек десе, енді біреулері оның спорттық қызметін ескере отырып, жаза ретінде "200 бёрпи" жасатуды әзілмен ұсынды.
Астана қаласы Полиция департаментінің баспасөз қызметі заң бұзушылық әлеуметтік желілерге мониторинг жүргізу барысында анықталғанын хабарлады.
"Әлеуметтік желілерге мониторинг жүргізу кезінде Mercedes-Benz маркалы автокөлігі жүргізушісінің жол қозғалысы ережелерін бұзғаны бейнеленген видеожазба анықталды. Жүргізушінің жеке басы анықталды. 34 жастағы құқық бұзушы жол белгілерімен белгіленген талаптарды сақтамағаны, қарсы бағыттағы көлікпен соқтығысу қаупін тудырғаны және маневр жасау ережелерін бұзғаны үшін әкімшілік жауапкершілікке тартылды", — делінген полиция хабарламасында.
Айтым Жақыпов - қазақстандық танымал блогер, спортшы. Оның Instagram-дағы парақшасына 3,9 миллион адам жазылған. Ол воркаут бойынша рекордшы, пауэрлифтер және артық салмақпен күресетін жандарға көмектесуге арналған жобалардың авторы ретінде кеңінен танымал.
Google News арқылы жаңалықтарымызды қадағалаңыз
Жазылу