Qazaq24.com, Sputnik.KZ дереккөзінен алынған мәліметтерге сүйене отырып түсініктеме береді..
АСТАНА, 16 ақпан – Sputnik. 2026 жылы микро және шағын бизнес үшін айыппұл мен өсімпұлдар есептен шығарылады. Қаржы министрлігі жаңа бұйрық жариялады.
Бұл 2026 жылдың 1 қаңтарындағы жағдай бойынша осы санаттарға жататын кәсіпорындарға қатысты.
Есептен шығаруға мыналар жатады:
2026 жылғы 1 қаңтардан бастап төлеу күніне дейінгі кезең үшін салық төлеушінің жеке шотында 2026 жылғы 1 қаңтардағы жағдай бойынша есептелген өсімпұлдар, сондай-ақ есептелген берешек;
2026 жылғы 1 қаңтардағы жағдай бойынша салық төлеушінің жеке шотында көрсетілген салықтық құқық бұзушылықтар үшін мемлекеттік салық инспекциясы салған айыппұлдар;
салық төлеуші 2026 жылғы 1 қаңтардағы жағдай бойынша төлеу мерзімі өзгертілген салықты және бюджетке төлемді төлеу жөніндегі салық міндеттемесін 2026 жылғы 1 сәуірге дейін толық орындаған жағдайда айыппұлдар мен өсімпұлдар;
2026 жылғы 1 қаңтарға дейін жасалған және салық төлеушінің жеке шотында есепке алынған айналым бойынша ҚҚС есепке алынбаған кезеңде айналым жасағаны үшін мемлекеттік салық инспекциясы салған айыппұл.
"Айыппұл мен өсімпұлдар сомаларын есептен шығарудың міндетті шарты 2026 жылғы 1 қаңтардағы жағдай бойынша салықтар мен бюджетке төленетін төлемдер бойынша берешек сомасын 2026 жылғы 1 қаңтар мен 31 наурыз аралығында толық өтеу болып табылады", - делінген бұйрықта.
Дегенмен, есептен шығаруға болмайтын кейбір сомалар бар. Оларға мыналар жатады:
жеке тұлғаның кәсіпкерлік қызметпен немесе жеке іс-тәжірибемен байланысты емес салық міндеттемелері бойынша есептелген өсімпұлдар;
кәсіпкерлік қызметті жүзеге асырумен және жеке іс-тәжірибемен айналысуға байланысты емес салық заңнамасын бұзғаны үшін мемлекеттік салық қызметі жеке тұлғаларға салатын айыппұл.
"Айыппұл мен өсімпұлдарды есептен шығару салық төлеушілердің жеке шоттарын түгендеу нәтижелері бойынша жүзеге асырылады. Түгендеуді Комиссия құрылған күннен бастап 2026 жылдың 31 наурызына дейін жүргізеді", - делінген құжатта.
Бұйрық 2026 жылдың 24 ақпанында күшіне енеді.