Azh.KZ парақшасынан алынған ақпаратқа сүйене отырып, Qazaq24.com хабарлама жасады..
Атырау облысы полиция департаментінің кинологиялық қызмет орталығында қоғамдық қауіпсіздікті қамтамасыз етуге үлес қосып жүрген ерекше маман бар. Ол – ветеринарлық фельдшер Татьяна Павловна Демяшева, деп жазады Polisia.kz.
Татьяна Павловна ішкі істер органдарында 2001 жылдан бері еңбек етіп келеді. Биыл ол өз кәсібіне адалдық танытқан 25 жылдық еңбек жолын атап өтпек. Волгоград ауыл шаруашылығы академиясында білім алған маман алғашқыда жеке ветеринарлық тәжірибемен айналысып, мал дәрігері болып жұмыс істеген. Кейін кинологиялық қызметтің бұрынғы басшысы Серік Айтбаевтың шақыруымен орталыққа келіп, полиция құрылымындағы ерекше әрі жауапты қызметін бастайды.
Кинологиялық орталықта қызметтік иттерді бейресми түрде «кіші қызметкерлер» деп атайды. Себебі олар қоғамдық тәртіпті сақтауға, іздестіру шараларына, жоғалған адамдарды табуға және арнайы операцияларға белсенді қатысады. Бүгінде орталықта 17 қызметтік-іздестіру иті бар. Олардың қатарында бельгиялық, неміс және шығыс еуропалық овчаркалар, лабрадорлар мен спаниельдер бар.
Ветеринарлық фельдшердің күнделікті жұмысы нақты тәртіпке негізделген: иттердің жағдайын бақылау, дене қызуын өлшеу, тәбеті мен мінез-құлқына назар аудару, вакцинация, паразиттерге қарсы өңдеу, дәрумендер беру және құжаттарға тіркеу. «Олар сөйлемейді, бірақ бәрін сезеді. Біз бір-бірімізді сөзсіз түсінеміз», – дейді Татьяна Павловна.
Пандемия кезінде ол блокбекеттерді аралап, иттердің жағдайын бақылап, ауа райының қолайсыздығына қарамастан олардың қауіпсіздігін қамтамасыз етті. Маман үшін ең ауыр сәт – қызметтік иттерді зейнетке шығарып салу. Әдетте олар 7–8 жасқа келгенде есептен шығарылады.
Татьяна Павловна үшін қызметтік иттер – жай ғана жануар емес, нағыз әріптестер. Оның еңбек жолы – ел қауіпсіздігіне үнсіз үлес қосып жүрген сенімді серіктерге деген адалдық пен жанашырлықтың айқын көрінісі.
Бүгін, 13:50