Qazaq24.com, Sputnik.KZ дереккөзінен алынған мәліметтерге сүйене отырып түсініктеме береді..
АСТАНА, 14 мамыр – Sputnik. Қазақстанда 11 жастағы қыздарды адам папилломасы вирусына қарсы жоспарлы вакцинациялау және 12–13 жастағы қыздарды толық иммундау жалғасып жатыр, деп хабарлайды денсаулық сақтау министрлігі.
Биыл 1 мамырға дейін республика бойынша 11-13 жастағы қыздарға адам папилломасы вирусына қарсы 398 мыңнан астам профилактикалық екпе жүргізілді. Оның ішінде 248 мың қызға бірінші доза, 150 мың қызға екінші доза егілді. Вакцина алғандар арасында иммундаудан кейінгі қолайсыз жағдай тіркелмеген.
Министрліктің хабарлауынша, санитариялық-эпидемиологиялық бақылау комитетіне АПВ-ға қарсы вакцинациялауды кеңейту туралы азаматтардан өтініштер түсіп жатыр.
"Сол себепті АПВ-мен байланысты онкологиялық аурулардың даму қаупін төмендетуге бағытталған профилактикалық шараларды одан әрі күшейту, сондай-ақ жасөспірімдерді қосымша қорғау үшін 14–17 жас аралығындағы қыздарға АПВ-ға қарсы қосымша вакцинация жүргізу туралы қаулыға қол қойылды", - дейді министрлікте.
Вакцинация ерікті негізде жүргізіледі. Айта кету керек, вакцинация қыздың немесе ата-анасының келісімі берілгенде ғана жасалады. Ол білім беру ұйымдарының медициналық кабинеттерінде немесе тіркелген жері бойынша емханаларда жүргізіледі.