Tengrinews.KZ парақшасындағы ақпаратқа сәйкес, Qazaq24.com хабар таратты..
Қазақстан премьер-министрінің орынбасары Қанат Бозымбаев бастаған қазақстандық делегация Шэньчжэнь қаласында (ҚХР) Alatau City-дің инвестициялық әлеуетін таныстырды, деп хабарлайды Tengrinews.kz тілшісі.
Қазақстан премьер-министрінің орынбасары Қанат Бозымбаев бастаған қазақстандық делегация Шэньчжэнь қаласында (ҚХР) Alatau City-дің инвестициялық әлеуетін таныстырды, деп хабарлайды Tengrinews.kz тілшісі.
Іс-шараға Қазақстан мен Қытай мемлекеттік органдарының, инвестициялық қорларының, қаржы институттарының, девелоперлік және технологиялық компанияларының өкілдері қатысты. Жиынға қатысушыларға Алатау қаласын дамытудың негізгі бағыттары, соның ішінде инвесторларға арналған жеңілдіктер, инвестициялық жобаларды "бір терезе" қағидаты бойынша сүйемелдеу және арнайы құқықтық режимнің басқа да мүмкіндіктері таныстырылды.
Фото: Alatau City Authority
Инновациялар, цифрлық басқару және инвестиция тарту саласындағы әлемдік көшбасшылардың бірі Шэньчжэнь тәжірибесін зерттеуге ерекше көңіл бөлінді. Қытай мегаполисінің үздік тәжірибесін Алатауды дамыту кезінде пайдалану жоспарланып отыр.
Роуд-шоу аясында China Resources, Ping An Group, China State Construction Engineering Corporation International (CSCEC International), Funde-Gemdale Group, China International Marine Containers Group (CIMC), Sunwah Group, SINOMACH Hainan Development және т.б. жетекші қытайлық корпорациялар мен инвестициялық топтар басшылығымен екіжақты кездесулер өткізілді.
Фото: Alatau City Authority
Келіссөздер барысында қытайлық компаниялардың Alatau City жобаларын іске асыруға қатысуы, өндірісті оқшаулау, технологиялар трансфері және қала құрылысы саласындағы озық тәжірибемен алмасу мәселелері талқыланды. Атап айтқанда, жаңа буын аккумуляторларын, энергия сақтау жүйелерін, заманауи ауыл шаруашылығы техникасын шығаратын өндірістер құру, электр көлігі мен қуаттау инфрақұрылымын дамыту, өнеркәсіп кәсіпорындарын, энергетика, инженерлік, көлік және логистикалық инфрақұрылым нысандарын салу, сондай-ақ Smart City технологияларын енгізу туралы келісімдерге қол қойылды.
Іс-шара қорытындысы бойынша ынтымақтастық туралы 24 келісімге қол қойылды. Өнеркәсіп, энергетика, логистика, жоғары технологиялар, қалалық инфрақұрылым және цифрлық экономика салаларындағы жалпы инвестициялық әлеуеті 6 миллиард АҚШ долларына дейінгі жобаларды іске асыру туралы уағдаластықтарға қол жеткізілді.
Фото: Alatau City Authority
Шэньчжэньдегі роуд-шоу Alatau City-дің инвестициялық мүмкіндіктерін халықаралық нарықта ілгерілетудің маңызды кезеңіне айналды және бизнестің Алатауды дамытуға қатысуға деген жоғары қызығушылығын растады. Инвесторларды тарту жұмыстары Гонконгтағы жетекші инвестициялық қорлардың, қаржы ұйымдарының, банктердің, сақтандыру компаниялары мен технологиялық корпорациялардың қатысуымен өтетін келесі іс-шаралар аясында жалғасады.
Анықтама: Шэньчжэньді "қытайлық экономикалық ғажайып" деп атайды. Кейінгі 45 жылда қала шағын елді мекеннен халқы 17 миллионнан асатын технологиялар, инновациялар мен венчурлік капиталдың әлемдік ірі орталықтарының біріне айналды. Мұнда Huawei, Tencent, DJI және BYD халықаралық компанияларының штаб-пәтерлері орналасқан. Бүгінде Шэньчжэнь жасанды интеллект, робототехника, цифрлық платформалар мен қалалық инфрақұрылымды басқару зияткерлік жүйелерін дамыту бойынша әлемдік көшбасшылар қатарына кіреді, ал оның тәжірибесі жаңа буынның заманауи қалаларын құруда кеңінен қолданылады.
Мән-жайы8-12 маусым аралығында Қытайда Alatau City жобасының роуд-шоуы өтіп жатыр: ол Шэньчжэнь, Гонконг және Макаода таныстырылады. Сапар мақсаты - Алатауды дамытуға инвесторларды, технологиялық компанияларды және халықаралық серіктестерді тарту.
Жобаның құқықтық негізі қаланды. 8 мамырда Мемлекет басшысы "Алатау қаласының айрықша құқықтық режимі туралы" Конституциялық заңға қол қойды. Ол қала үшін дамудың ерекше шарттарын: жаңа басқару моделін, инвесторлар мен бизнес үшін бөлек ережелерді, сондай-ақ Алатау резиденті мәртебесін бекітеді.
2 маусымда Қасым-Жомарт Тоқаев Алатау қаласын дамыту мәселелері бойынша кеңес өткізді. Президент сол кезде жоба іскерлік белсенділік пен инновациялардың жаңа орталығына айналуы тиіс екенін атап өтіп, қажетті нормативтік актілерді қабылдауды жеделдетуді тапсырды. Оның айтуынша, инвесторлар өздеріне қажетті жағдай жасалғанша жылдап күтпейді.
Бүгінде Алатау нөлден бастап салынып жатқан жаңа қала ретінде дамып келеді. Оның аумағы 88 мың гектар және 2050 жылға дейін кезең-кезеңімен дамытылатын төрт функционалдық аймаққа бөлінген. Қалада қазірдің өзінде Gate City тұрғын ауданын қалыптастыру жұмыстары жүргізіліп жатыр, бес жүйе құраушы кәсіпорын жұмыс істеп тұр, ал инвестициялық жобалар портфелінің жалпы құны 2 триллион теңгеден асады.
Тағы оқыңыз: Бозымбаев Шэньчжэнь мэрімен инновациялық қалаларды дамыту тәжірибесін талқылады