7kun.KZ парақшасынан алынған ақпаратқа сәйкес, Qazaq24.com хабарлайды..
Қазақстанда атом электр станциясы мен ірі көлік жобаларының қауіпсіздігін қамтамасыз етуге бағытталған жаңа міндеттер жүктелді.
Бұл мәселе Сауда және интеграция министрі Арман Шаққалиевтің төрағалығымен өткен Техникалық реттеу және метрология мәселелері жөніндегі комиссия отырысында қаралды.
Жиында көлік саласындағы техникалық реттеу жүйесінің қазіргі жай-күйі талқыланып, теміржол, автомобиль жолдары, метрополитен, азаматтық авиация және жол бойындағы сервис нысандарының қауіпсіздігін арттыру мәселелеріне ерекше назар аударылды. Сонымен қатар ұлттық сынақ инфрақұрылымын дамыту, зертханалардың мүмкіндіктерін кеңейту және техникалық регламенттердің талаптарына сәйкестікті бағалау тетіктерін жетілдіру міндеттері белгіленді.
Комиссия отырысында Астанадағы жеңіл рельсті көлік (LRT) жобасының техникалық және метрологиялық сүйемелденуі де жеке қаралды. Мамандар нысанның стандарттау және өлшем бірлігін қамтамасыз ету талаптарына толық сәйкес болуы үшін қажетті жұмыстардың жүргізіліп жатқанын атап өтті. Сондай-ақ жолаушылар тасымалы қауіпсіздігін арттыру, такси қызметін реттеу және тұрақты авиациялық отын стандарттарын енгізу мәселелері талқыланды.
Күн тәртібіндегі негізгі тақырыптардың бірі – Қазақстандағы атом электр станциясын салу жобасы болды. Отырыста АЭС-ті жобалау, салу және пайдалану кезеңдеріндегі техникалық реттеу, стандарттау және метрологиялық қамтамасыз ету жұмыстарының барысы қаралды. Ведомстволар бірлескен жоспар аясындағы іс-шаралардың белгіленген мерзімде орындалып жатқанын мәлімдеді.
Сондай-ақ атом энергетикасы саласына қажетті нормативтік-құқықтық базаны жетілдіру, ұлттық эталондық қорды дамыту және салаға білікті кадрлар даярлау мәселелері көтерілді. Бұл жұмыстар болашақта АЭС құрылысы мен пайдалану кезеңіндегі қауіпсіздік талаптарын халықаралық стандарттарға сәйкестендіруге мүмкіндік береді.
Отырысты қорытындылаған Арман Шаққалиев стратегиялық маңызы бар көлік және энергетика жобаларын іске асыру барысында сапаның ұлттық инфрақұрылымын уақытылы дайындаудың маңызын атап өтті. Нәтижесінде мемлекеттік органдарға техникалық реттеу, стандарттау және метрология жүйесін жетілдіру бойынша нақты тапсырмалар берілді.
Мамандардың пікірінше, қабылданған шешімдер еліміздегі көлік инфрақұрылымы мен болашақ атом энергетикасы нысандарының қауіпсіздігін арттырып, Қазақстан экономикасының бәсекеге қабілеттілігін күшейтуге ықпал етеді.