Әл ауқат калькуляторына қолжетімділік шектелді: не болды

Қазақстандықтар өз отбасының әлеуметтік әл-ауқат деңгейін біліп, мемлекеттік жәрдемақылар мен төлемдерге құқығы бар-жоғын тексере алатын әл-ауқат калькуляторы көпшілікке қолжетімсіз болып қалды, деп хабарлайды Tengrinews.kz тілшісі.

Әл-ауқат калькуляторына не болды?

18 қазанда eGov.kz порталында ресми онлайн әл-ауқат калькуляторы іске қосылған еді.

Алайда 19 қазанда бұл сервис барлық азаматқа қолжетімсіз болып қалды.

Әл-ауқатының деңгейін бағалағысы келгендерге шектеу қойылды.

Сервиске қолжетімділік шектелді. eGov Mobile қосымшасынан скриншот

Бұған дейін Еңбек және халықты әлеуметтік қорғау министрлігі бұл калькулятор азаматтарға бағалау критерийлерімен танысуға және әр отбасының әл-ауқат деңгейін анықтауға мүмкіндік беретінін атап өткен болатын. Бұл ретте министрлік алынған нәтиже тек анықтамалық сипатта екенін атап өтті. Бұл адамға әлеуметтік төлемдер тағайындалады немесе тоқтатылады дегенді білдірмейді.

Қазақстанда жәрдемақы тағайындау жүйесі өзгеріп жатыр. Әл-ауқат деңгейіне байланысты қазақстандықтар бес топтың біріне (A, B, C, D немесе E) жатқызылады. Төлем көлемі немесе оның мүлдем берілу-берілмеуі осыған байланысты болады.

Еңбек министрлігі бұл көмектің атаулылығын қамтамасыз ету үшін қажет екенін түсіндірді. Кімдер жәрдемақы ала алады, кімдерге бас тартылады және әр санаттың сипаттамасы қандай екені туралы толығырақ мына сілтеме арқылы оқыңыз.

Жаңа тәсіл Қазақстанда 2027 жылғы 1 қаңтардан бастап күшіне енеді. Жаңа ереже бойынша қандай жәрдемақылар тағайындалатынын мына жерден оқыңыз.

Тағы оқыңыз: Қазақстандықтарға келесі аптадан бастап әл-ауқат деңгейі туралы хабарлама жіберіледі

Бізді Google-дың негізгі дереккөздер тізіміне қосыңыз