Qazaq24.com, Sputnik.KZ дереккөзінен алынған мәліметтерге сүйене отырып мәлімдеме жасады..
АСТАНА, 26 тамыз – Sputnik. Үкімет отырысында Alatau City қаласын дамыту жобаларының жүзеге асырылу барысы қаралды, деп хабарлайды Sputnik Қазақстан.
Үкіметтің мәліметінше қазіргі таңда қаланың инвестициялық қоржыны 67 жобаға дейін ұлғайып, инвестициялардың жалпы көлемі шамамен $6,9 млрд-ты құрады. Жобалар аясында 55 мыңға жуық жұмыс орнын ашу жоспарланып отыр.
PepsiCo, Sunny Paper, Mars Petcare KZ, Griffin Logopark, "ДанаФлекс" және G-Trans Service компанияларының өндірістік және логистикалық жобалары жүзеге асырылып жатыр. Сонымен қатар Iconic Complex, KIND K-Smart Town сияқты ірі жобалар пысықталуда.
"Alatau Crypto City бағыты бойынша да жұмыстар жүргізіліп жатыр. Ұлттық банкпен бірлесіп Tokenization by Default тұжырымдамасы әзірленді. Токенизация жобаларына 43 халықаралық және қазақстандық компания қызығушылық танытқан. Оларды 2026 жылдың соңына дейін іске қосу жоспарланып отыр", - деп жазылған хабарламада.
Қала инфрақұрылымын дамыту аясында 26 жоба қарастырылған. Оның ішінде электрмен, сумен жабдықтау, су бұру және жол инфрақұрылымын дамыту жұмыстары бар. Жоспар бойынша 61,2 шақырым жол жөнделіп, 15 шақырым жаңа жол салынады.
Отырыс қорытындысында премьер-министр Олжас Бектенов жобаларды белгіленген мерзімде іске асыруды және Alatau City инфрақұрылымын дамыту жұмыстарын жеделдетуді тапсырды.