Aikyn.KZ парақшасынан алынған деректерге сүйене отырып, Qazaq24.com жаңалық жариялайды..
Тараз қаласында ақын Ербол Бықыбаев ұсталды. Оған терроризмді насихаттады деген күдік келтіріліп отыр, – деп хабарлайды Aikyn.kz сайты.
Бұл туралы заңгер Дәулетхан Ахметов әлеуметтік желідегі парақшасында мәлімдеді.
Заңгердің айтуынша, ақынға қатысты Қылмыстық кодекстің 256-бабының 2-бөлігі бойынша тергеу жүргізіліп жатыр. Аталған бап бұқаралық ақпарат құралдарын немесе ақпараттық-коммуникациялық желілерді пайдаланып терроризмді насихаттауға қатысты.
Бұл қылмыс үшін заңда 7 жылдан 12 жылға дейін бас бостандығынан айыру жазасы қарастырылған.
Дәулетхан Ахметов ақынның ұсталуына әлеуметтік желіде тараған бейнежазба себеп болуы мүмкін екенін айтты. Онда Ербол Бықыбаев діни тақырыпқа қатысты өткір пікір білдірген. Дегенмен дәл осы бейнежазбаның қылмыстық іске негіз болғаны әзірге ресми түрде расталған жоқ.
Ербол Бықыбаев әлеуметтік желіде қоғамдық мәселелерге арналған өлеңдерімен танылған. Әсіресе, Талғарда қаза тапқан Шерзат Полаттың өліміне қатысты жазған шығармалары көпшілік арасында кең тараған.
Құқық қорғау органдары әзірге оқиғаның толық мән-жайына қатысты ресми түсініктеме жариялаған жоқ.