Алматы метросында 8 миллиард теңгеге платформалық есіктер орнатудан бас тартты

Осы көктемде Алматы метросының жұмыс істеп тұрған барлық станциясына платформалық есіктер орнату жоспарланған еді. Жобаның құны 8 миллиард теңгеден астам сомаға бағаланып, жұмыстарды 2027 жылдың соңына дейін аяқтау көзделген болатын. Алайда қазір жағдай өзгерді. Tengrinews.kz не болғанын анықтап көрді.

8 миллиард теңгелік платформалық есіктердің тағдыры не болды?

2026 жылғы сәуірде "Метрополитен" КМК Tengrinews.kz-ке жұмыс істеп тұрған барлық 11 станцияға платформалық есіктер орнату жоспары туралы хабарлаған болатын. Ол кезде жобаның құны 8,27 миллиард теңгеге бағаланып, жұмыстарды 2027 жылдың соңына дейін аяқтау жоспарланған еді.

Алайда қазір Алматы қаласының Жол инфрақұрылымын дамыту басқармасы басқа ақпарат берді.

"Бүгінде метрополитеннің жұмыс істеп тұрған станцияларында платформалық есіктер орнату жобасын қаржыландыру қарастырылмаған", – делінген басқарманың жауабында.

Жобадан не себепті бас тартқанын білу үшін метрополитенге сауал жолдаған едік. Ондағылар сұрақтарды жол инфрақұрылымын дамыту басқармасына бағыттады. Мақала жарияланған сәтте мемлекеттік органнан жауап ала алмадық.

Айта кетейік, сәуірде метрополитен өкілдері платформалық есіктер болашақта салынып жатқан станцияларда да пайда болуы мүмкін екенін айтқан болатын. Алайда "Қалқаман" станциясы ашылғанға дейін мұндай жұмыстар жүргізілмейді.

"Қалқаман" станциясының құрылыс жобасы аяқталу сатысында. Осыған байланысты жобалық құжаттамаға өзгерістер енгізу қарастырылмаған. "Қалқаман" станциясында платформалық есіктер орнату мүмкіндігі нысан пайдалануға берілгеннен кейін қарастырылады", – деп хабарлады басқарма.

Есіктерді қай станцияларға орнату жоспарланған еді?

Бұған дейін метрополитен жұмыс істеп тұрған барлық 11 станцияны қорғаныс есіктерімен жабдықтауды жоспарлаған. Алғашқы кезекте "Абай", "Райымбек батыр", "Байқоңыр" және "Бауыржан Момышұлы" станцияларына есік орнату көзделген еді.

Станциялардың кезектілігін жолаушылар ағынына қарай анықтау жоспарланған болатын.

Сондай-ақ "Метрополитен" КМК жобалау-сметалық құжаттаманың әзірленіп, бекітілгенін хабарлаған. Метрополитен тіпті болашақ платформалық есіктердің қалай көрінетінін де көрсеткен.

"Метрополитен" КМК-ның Tengrinews.kz үшін арнайы дайындаған рендері

Алғышарты: қайғылы оқиғадан кейінгі уақытша шаралар

2024 жылы 10 желтоқсанда «Абай» станциясында 26 жастағы зағип ер адам, рельске құлап кеткен.

2025 жылғы қаңтардағы қайғылы оқиғадан кейін метрода уақытша темір қоршаулар орнатылып, ақпан айында оларды жарнамалық баннерлерге ауыстыра бастады.

Әлихан Сариевтің фотосы / Тengrinews.kz

Анықтама. Қоршаулар платформалардағы вагондардың арасындағы бекітпелерге қарама-қарсы орналасқан. Олар құрам тоқтаған кезде жолаушылардың жолға құлап кетуінің алдын алуға арналған.

Фото: gov.kz

Осы ретте әкімдік платформалық есіктердің бәрібір орнатылатынын айтқан еді. Алайда содан бері екі жылға жуық уақыт өтсе де, жоба әлі жүзеге асқан жоқ. Редакция жағдайдың қалай өрбитінін бақылауды жалғастырады.

Алматыдағы жаңа метро желілері

Алматының 2040 жылға дейінгі бұған дейін жарияланған Бас жоспарының жобасына сәйкес, қала метросын айтарлықтай кеңейту көзделген. Билік мегаполистің әр бөлігін байланыстыратын үш желіден тұратын толыққанды метро жүйесін құруды жоспарлап отыр.

Бірінші желі (қызыл): вокзалдан базарға дейін

Қазір метроның бірінші желісі "Бауыржан Момышұлынан" "Райымбек батырғ" дейінгі жалпы ұзындығы 14,3 шақырым, барлығы 11 станция бар.

Болашақта ол екі бағытта да ұзартылады:

Батысқа қарай: салынып жатқан "Қалқаман" станциясынан "Барлық" базарына дейін тағы үш станция салынады. Бұл учаскенің ұзындығы 5,3 шақырым болады. "Барлық" базары маңында көлік ауыстырып міну торабын салу жоспарланған. Қазір жұмыс құжаттамасы әзірленіп, дайындық жұмыстары басталған. "Қалқаман" станциясын 2026 жылдың соңына дейін, ал "Барлыққа" дейінгі учаскені 2029 жылы іске қосу жоспарланып отыр. Солтүстікке қарай: "Райымбек батыр" станциясынан желі Алматы-1 теміржол вокзалына дейін созылады. Бұл бағытта тағы бес станция салынып, желі 7,7 шақырымға ұзарады.

Нәтижесінде бірінші желідегі станциялар саны 20-ға дейін артып, жалпы ұзындығы шамамен 29,2 шақырымға жетеді деп жоспарланған.Алматы метросының болашақ желілерінің схемасы / Фото қаланың Бас жоспарының таныстырылымында түсірілген / Желтоқсан, 2025 жыл

Екінші желі (көгілдір): қала арқылы өтетін сақина және әуежайға баратын жол

Екінші желі Алматы метро жүйесіндегі ең ауқымды желі болуы мүмкін. Жоба бойынша оның ұзындығы шамамен 76,6 шақырымды құрап, станциялар саны 42-ге жетеді. Бас жоспар жобасына сәйкес, желі сақина тәрізді болады және қаланың негізгі аудандарының басым бөлігін қамтиды.

Маршрут: желі мегаполистің батысы мен шығысын байланыстырады. "Барлық" базары ауданынан басталып, ірі магистральдар бойымен өтеді. Одан кейін солтүстікке қарай Алматы-1 вокзалына, әрі қарай Алматы халықаралық әуежайына бағытталады. Сақинаның оңтүстік бөлігі Әл-Фараби даңғылы мен Тимирязев көшесінің бойындағы тұрғын аудандарды қамтиды. Бірінші кезең: қолданыстағы "Жібек жолы" станциясынан әуежайға дейінгі бағыт. Ұзындығы шамамен 14 шақырым болатын бұл учаскеде сегіз станция салу жоспарланған. Құрылысты 2027 жылы бастап, желіні 2032 жылы іске қосу көзделіп отыр.

Алматы метросының болашақ желілерінің схемасы / Фото қаланың Бас жоспарының таныстырылымында түсірілген / Желтоқсан, 2025 жыл

Үшінші желі (жасыл): Алатау қаласына дейін

Үшінші желі Алатау қаласы мен оның Gate City ауданын бірінші желідегі "Сайран" станциясымен байланыстыруы тиіс.

Жол инфрақұрылымын дамыту басқармасының соңғы мәліметіне сәйкес, желінің ұзындығы 22 шақырым болады және онда 14 станция салу жоспарланған.

Қазір жобаның техникалық-экономикалық негіздемесі әзірленіп, мемлекеттік сараптамаға дайындық жүргізіліп жатыр. Құрылыстың басталу және желінің іске қосылу мерзімі әзірге белгісіз.

Анықтама. Айта кетерлігі, жобаның параметрлері өзгерді. Бұған дейін Бас жоспардың таныстырылымында ұзындығы 28 шақырымдық, 17 станциясы бар желі туралы айтылған болатын.

Алматы метросы қанша жолаушы тасымалдады?

Алматы метрополитені – Қазақстандағы алғашқы әрі әзірге жалғыз метро. Ол 2011 жылғы 1 желтоқсанда ашылды.

Бас жоспар құжаттарына сәйкес, метро іске қосылғаннан бері 83 миллионнан астам жолаушы тасымалдаған. Ұсынылған мәлімет бойынша, метроның үлесіне қаладағы қоғамдық көлікпен тасымалдың 8,2 пайызы тиесілі. Ал жолаушылар ағыны жыл сайын шамамен 10 пайызға артып келеді.

Google News арқылы жаңалықтарымызды қадағалаңыз

Жазылу