Алматы облысының жаңа әкімін тағайындау үшін депутаттар жиналады

Алматы облысында өңірдің жаңа әкімін тағайындауға келісім беру үшін мәслихат депутаттары жиналады. Жиын 4 қыркүйекте Қонаевта өтеді, деп хабарлайды Tengrinews.kz.

Депутаттар қашан жиналады?

Алматы облыстық мәслихатының ресми хабарламасына сәйкес, депутаттар жиналысы 2026 жылғы 4 қыркүйекте сағат 10:00-де өтеді.

Шара Қонаевтағы Жамбыл көшесі, 13/1 мекенжайында орналасқан Мәдениет үйінде өтеді. Депутаттарды тіркеу сағат 09:00-де басталады.

Жиында депутаттар Алматы облысының әкімін тағайындауға келісім беруі тиіс.

Қазіргі уақытта кандидаттың есімі ресми түрде жарияланған жоқ.

Бүгінде Алматы облысын Марат Сұлтанғазиев басқарып отыр. Ол өңір әкімі лауазымына 2022 жылдың маусымында тағайындалған болатын.

Марат Сұлтанғазиев Абай атындағы Алматы мемлекеттік университетін, Қазақ мемлекеттік заң академиясын, Рысқұлов атындағы Қазақ экономикалық университетін бітірген. Мамандығы бойынша - экономист-қаржыгер, заңгер, іскерлік әкімшілендіру магистрі.

Еңбек жолын Алматы қаласы Әуезов ауданының салық инспекторы болып бастаған. 2010 жылға дейін Алматы қаласы Салық департаментінде түрлі лауазымда қызмет атқарды. Кейін Қаржы министрлігінің Салық және кеден заңнамасы мәселелерін үйлестіру, кірістерді талдау және болжау департаментін басқарды. 2012 жылы Президент Әкімшілігінің Әлеуметтік-экономикалық мониторинг бөліміне жұмысқа ауысты. 2014 жылы Алматы бойынша Мемлекеттік кірістер департаментінің басшысы болды.

2018 жылдың қазанында Марат Сұлтанғазиев Мемлекеттік кірістер комитетін басқарды, ал 2021 жылы қаржы вице-министрі болып тағайындалды.

2022 жылғы 11 маусымда Қасым-Жомарт Тоқаев Марат Сұлтанғазиевті Алматы облысының әкімі етіп тағайындады.

Google News арқылы жаңалықтарымызды қадағалаңыз