Sputnik.KZ парақшасынан алынған деректерге сүйене отырып, Qazaq24.com жаңалық жариялайды..
АСТАНА, 10 желтоқсан – Sputnik. Алматыда түннен бері қар қалың жауып, жолдарды тазалауға 3 мыңға жуық жұмысшы жұмылдырылды, деп хабарлады қала әкімдігі.
"9 желтоқсанда 22:30-да басталған жауын-шашын түн ішінде қарға ұласып, 10 желтоқсан таңғы 07:00-де қардың қалыңдығы 35 сантиметрге жетті. Бұл айлық норманың жартысына жуық көрсеткіш", - деп жазылған хабарламада.
Әкімдік мәліметінше, қаланың қарын күреуге 2 728 жұмысшы, 75 жедел бригада және 923 арнайы техника, оның ішінде 228 құрама жол машиналары жұмылдырылды. Техника колонналарының қозғалысын полиция қызметкерлері қамтамасыз етіп отыр.
Таңғы сағат 4-тен бастап магистральдар мен аудандық көшелерді тазалау жүргізіліп жатыр, ал таңғы 5-те аула аумақтары тазартылған. Бұл жұмыстарға мердігер ұйымдардың 1 790 қызметкері мен 256 техникасы қосымша тартылған.
Қалада тәулік бойы кезекшілік ұйымдастырылған, дейді әкімдіктегілер.