Qazaq24.com, Egemen.KZ дереккөзінен алынған мәліметтерге сүйене отырып мәлімдеме жасады..
Фото: istockphoto.com
Алматы қаласының әкімі Дархан Сатыбалдының тапсырмасымен қалада студенттер жатақханаларының қорын кеңейту жұмыстары жалғасып жатыр. 2026 жылы жалпы саны 4,7 мыңға жуық орынға арналған 13 жаңа жатақхананы пайдалануға беру жоспарланған.
Қазіргі таңда Алматыда 221 мыңнан астам студент білім алады. Оның ішінде 149 мыңы еліміздің өзге өңірлерінен келген жастар.
Бүгінде қалада жалпы сыйымдылығы 46,2 мың төсек-орын болатын 136 жатақхана жұмыс істейді. Соған қарамастан, жатақханаға деген қажеттілік шамамен 5,7 мың орынды құрайды.
Осы мәселені шешу мақсатында Алматы әкімдігі Ғылым және жоғары білім министрлігімен бірлесіп, студенттер жатақханаларының құрылысын үйлестіретін жобалық кеңсе құрған.
2025 жылы қалада 4,5 мың орынға арналған 13 жатақхана пайдалануға берілді. Сонымен қатар студенттердің баспанаға деген қажеттілігін және алдағы құрылыс жоспарларын қамтитын арнайы қажеттілік картасы әзірленді.
2030 жылға дейін Алматыда қосымша 20 мыңға дейін жаңа төсек-орын ашу жоспарланып отыр. Бұл студенттерді жатақханамен толық қамтамасыз етуге мүмкіндік береді.