Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..
Алматы қаласындағы элиталық QSI мектебінің оқушысы өзіне қол жұмсауға әрекеттенгеннен кейін жансақтау бөліміне жеткізілді, – деп хабарлайды Aikyn.kz сайты.
Бұл туралы қыздың әкесі Қанат Амиркин мәлімдеді.
Оның айтуынша, соңғы бір жыл бойы ол мектеп әкімшілігіне қызына қатысты буллинг фактілері жөнінде бірнеше рет шағымданған. Бірақ әкесінің сөзінше, мектеп тарапынан тиісті шаралар қабылданбаған. Ер адамның айтуынша, сыныптастары баланы мазақ еткен, ал педагогтар бұл жағдайға дер кезінде араласпаған.
Оқиғадан кейін Қанат Амиркин мектепке барып, басшылық тарапынан салқын әрі формалды қарым-қатынасқа тап болғанын айтады. Оның сөзінше, мектеп директоры мисс Махон жағдайдың ауырлығын толық сезінбеген және өзін жоғарыдан сөйлегендей ұстаған.
– Мектепте баланың өміріне қауіп төнген жағдай болғанына қарамастан, директор бұл мәселеге салғырт қарады. Айтылған уәждер мүлде түсініксіз болды. «Сіздердің елдеріңізде суицид деңгейі жоғары, біз не істей аламыз?» деген мазмұндағы сөздер айтылды. Бұл жылына 25 мың доллар төленетін мектептегі «қамқорлықтың» үлгісі ме? – деп жазды ол әлеуметтік желідегі жазбасында.
Сондай-ақ әкесі буллингке қатысы бар деп болжанғандардың бірі жоғары лауазымды шенеуніктің баласы болуы мүмкін екенін де алға тартты.
Қазақстан Республикасы Оқу-ағарту министрлігінің Балалардың құқықтарын қорғау комитеті бұл жағдайдың бақылауға алынғанын хабарлады. Мектепке мобильді психологиялық көмек тобы жіберіліп, балаға жеке психологиялық сүйемелдеу ұйымдастырылатыны айтылды. Сонымен қатар мектеп әкімшілігіне алдын алу және профилактикалық жұмыстар жүргізу ұсынылды.
Алматы қалалық полиция департаментінде буллинг фактісі бойынша қылмыстық іс қозғалғаны мәлім болды.