Qazaq24.com, Tengrinews.KZ дереккөзінен алынған мәліметтерге сүйене отырып ақпарат жариялайды..
Кейінгі уақытта Алматы тұрғындары түшкіру, мұрынның бітелуі, қышу және ісіну сияқты аллергия белгілерінің күшейгеніне шағымданып жатыр. Кей қалалықтар үйреншікті антигистаминдік препараттардың бұрынғыдай көмектеспейтінін, ал сырқаттың әлдеқайда ауыр сезілетінін айтады. Мұның себебін Tengri Health тілшісі анықтап көрді.
Жусан тозаңы 2,6 есеге артты
Біз бұл мәселеге қатысты Қазақ ұлттық аграрлық зерттеу университетінде апта сайын тозаң мониторингін жүргізетін қазақстандық ғалым және профессор Қайсар Табыновтың пікірін білдік.
Оның айтуынша, қазір Алматыдағы жағдай шынымен де күрделі. Бұл жусанның белсенді тозаңдану кезеңімен, ойраншөптің жоғары концентрациясымен және тағы бір тозаңды аллергенмен байланысты.
Алматылықтар аллергияға шағымдануда. Скриншоттар: Threads
17-23 тамыз аралығындағы мониторинг мәліметтері мұны растап отыр, деп атап өтті ол.
Ғалымның мәліметінше, ең жоғары көрсеткіш жұма күні, 21 тамызда тіркелген. Бұл күні жусан тозаңының концентрациясы текше метрге 638 түйірге жеткен.
Анықтама: "Текше метрге шаққандағы түйір" деген тіркес ауаның бір текше метріндегі тозаң түйіршіктерінің (тозаңның) шоғырлануын білдіреді. 638 түйір - өте жоғары концентрация. Тозаңға аллергиясы бар адамдарда бұл мұрынның бітелуін, түшкіруді, көздің қышуын және жас ағуын тудыруы мүмкін. 10 түйірге дейінгі көрсеткіш төмен деп есептеледі.
"Бұл маусымдағы абсолюттік рекорд, ол критикалық көрсеткіштен (текше метрге 200 және одан да көп түйір) үш есеге жуық жоғары. Дәл сол күні ауада ойраншөптің жоғары концентрациясы - текше метрге 91 түйір сақталды. Тағы 83 түйір алабота тұқымдастарға тиесілі болды".
Анықтама: Алаботалар (Маревые) - бұл сорң, қарасора және басқа да өсімдіктер жататын топтың атауы. Бұл Қазақстан үшін өте тән топ: оның көптеген өкілі құрғақ климатта және сор топырақтарда жақсы өседі.
Табыновтың айтуынша, жусаннан кейін алабота - бүкіл ел бойынша маңыздылығы жағынан екінші тозаңды аллерген болып саналады.
"Шын мәнінде, қазір аллергиямен ауыратындарға қиын болуының басты себебі осында - ауада бір уақытта гүлдейтін үш бірдей арамшөп аллергенінің тозаңы бар", - деді профессор.
Бір апта ішінде жусанның орташа концентрациясы текше метрге 269 түйірді, ал амброзия - 83-ті құрады. Апта бойы қала ауасында есепке алынған барлық тозаңның 81 пайызы осы екі өсімдікке тиесілі болды. Сорң тұқымдастармен бірге бұл көрсеткіш 92 пайызға жетті.
Ғалым Алматы тұрғындарына тәуліктік тозаң жүктемесінің шамамен 80 пайызы сағат 8:00-ден 15:00-ге дейінгі уақытқа келетінін ескертті. Дәл осы сағаттарда ауадағы тозаң концентрациясы ең жоғары болады.
Амброзия 84 пайызға арттыКейінгі аптада тозаң жүктемесі төмендеген жоқ, керісінше, айтарлықтай өсті, дейді профессор.
"Жусанның апталық жалпы жүктемесі өткен аптамен салыстырғанда 263 пайызға артты - жеті күн ішіндегі жиынтық көрсеткіш текше метрге 518-ден 1880 түйірге дейін өсті. Амброзия бойынша өсім 84 пайызды құрады - 317-ден 583 түйірге дейін", - деп атап өтті спикер.
Бұл ретте апта ішінде көрсеткіштер қатты өзгеріп отырды. Жұма күнгі жусанның рекордтық 638 түйірінен кейін, жексенбіге қарай концентрация күрт төмендеп, 73 түйірге дейін түсті. ойраншөптің апталық минимумы 18 түйір болды.
Сондықтан жексенбі күні аллергиясы бар жандарға біршама жеңілдеу болған шығар, бірақ ғалымның пікірінше, бұл тозаңдану маусымы бәсеңдеді дегенді білдірмейді.
Жоғары концентрация сақталады: аллергия қашан басылады?Сарапшының айтуынша, Алматыда жусан мен ойраншөптің белсенді тозаңдануы әдетте тамыз айы бойы жалғасады және қыркүйектің көп бөлігін қамтиды. Құрғақ және желді ауа райында концентрация қайтадан күрт артуы мүмкін.
Табынов тозаң жүктемесінің айтарлықтай және тұрақты төмендеуі әдетте күн суытып, күзгі алғашқы жаңбырлар немесе үсік жүргенде ғана басталатынын атап өтті. Әдетте бұл қыркүйектің соңы мен қазан айынан ерте болмайды.
"Сірә, жоғары көрсеткіштер тағы бірнеше апта бойы сақталады", - деп толықтырды ол.
Солдан оңға қарай: микроскоппен қарағандағы көлемі 20-30 микрометр болатын жусан мен амброзия тозаңы. Фото: Қайсар Табынов
Кейбір алматылықтар өткен жылы аллергия жеңілірек болғанын, үйреншікті дәрілердің көмектеспей бастағанын айтып, тамыз айындағы жусан көрсеткіші рекордтық болғанына шағымданса да, Қайсар Табынов биылғы маусымды әзірге ең ауыр деп атауға болмайтынын айтты.
Алматыдағы жол жөндеу жұмыстары біздің жағдайымызға қалай әсер етеді?"Өткен жылы біз жусан тозаңының бұдан да жоғары концентрациясын тіркеген болатынбыз. Бірақ кейінірек, қыркүйекте орташа есеппен текше метрге 1000-нан астам түйір болды. Сондықтан жусан бойынша биылғы тамыз қарқынды болғанымен, бүкіл маусым аясында міндетті түрде рекорд емес", - деп түйіндеді ол.
Айта кетейік, кейбір қолданушылар аллергияның күшеюін қаладағы жол және құрылыс жұмыстарының көптігімен байланыстырады.
"Алматының түкпір-түкпіріндегі құрылыс пен маусымдық шөптердің қосылуы нағыз "комбо" болды. Таңертеңнен көзім қышып, түшкіре беремін", - деп жазады қала тұрғыны.
Біз Қайсар Табыновтан жол және құрылыс жұмыстары аллергия белгілерін күшейтуі мүмкін бе деп сұрадық.
Ғалымның айтуынша, құрылысты тозаң аллергиясының өсуімен тікелей байланыстыруға болмайды. Дегенмен, құрылыс жұмыстарынан кейінгі аумақтардың жағдайы расында да маңызды рөл атқарады.
Жұмысшылар топырақ қабатын бұзғанда, ашық учаскелер - жол жиектері, бос жатқан жерлер, топырағы ашылған аумақтар пайда болады. Мұндай орындар кейбір арамшөптердің, соның ішінде ойраншөптің өсуіне қолайлы.
Көп нәрсе реконструкциядан кейін аумақтардың қалай қалпына келтірілетініне және олардың күтіміне байланысты.
"Қалалық жұмыстардың сапалы аяқталуы, аумақты абаттандыру, көгалдандыру, тұрақты өсімдік жамылғысын қалыптастыру және кейінгі күтім арамшөптердің бақылаусыз таралу аймағын азайтады".
Табыновтың пікірінше, болашақта тозаң мониторингі деректері, арамшөптердің таралуы туралы ақпарат және қаланы көгалдандыру жұмыстары бір-бірін толықтыра алады. Бұл алдағы уақытта қаланы абаттандырып қана қоймай, жоспарлау кезінде ауа сапасы мен халық денсаулығына әсер ететін факторларды да ескеруге мүмкіндік береді.
Жусан мен ойраншөп: қазақстандық ғалым аллергиясы бар Алматы тұрғындарына ескерту жасады
Google News арқылы жаңалықтарымызды қадағалаңыз
Жазылу