Sputnik.KZ парақшасынан алынған ақпаратқа сүйене отырып, Qazaq24.com хабарлама жасады..
АСТАНА, 6 ақпан – Sputnik. Ақмола облысында полиция қызметкерлері алаяқтық қылмысты жедел ашып, өңір тұрғынына 950 мың теңгесін қайтаруға көмектесті, деп хабарлайды облыстық полиция.
Қаңтар айының соңында әйелге танысы хабарлама жазып, шұғыл қарызға ақша сұраған. Ақмола тұрғыны банк депозитінде жатқан бір миллион теңгеге жуық ақшаны аударған.
"Алайда біраз уақыттан кейін танысының аккаунты бұзылғаны, хабарламаны алаяқтар жібергені белгілі болды. Қылмыстық схеманың құрбаны болғанын түсінген әйел бірден полицияға жүгінді", - деп жазылған хабарламада.
Тергеу полиция жедел капитаны Әлия Тәшімоваға тапсырылды. Жедел іздестіру іс-шаралары барысында полиция қызметкері ақша аударылған банктік шоттың иесін анықтады. Ол Қарағанды қаласының тұрғыны болып шықты.
Полиция қызметкері дереу ер адаммен байланысып, оған жағдайды түсіндіріп, ұрланған қаражатты аударуға және қолма-қол ақшаға айналдыруға байланысты заңсыз қаржылық операцияларға қатысқаны үшін қылмыстық жауапкершілік туралы ескертті.
Әңгімеден кейін ер адам Ерейментау ауданының полиция бөліміне келіп, шотына ақша түскенін растады. Жағдайдың құқықтық салдарын түсінген ол келтірілген залалды өз еркімен толық көлемде өтеді. Ақшалай қаражат заңды иесіне қайтарылды.