АҚШ та 200 жыл ішінде алғаш рет қызғаныш үшін кісі өлтірген әйел өлім жазасына кесіледі

АҚШ-тың Теннесси штатында кейінгі 200 жылдан аса уақыт ішінде алғаш рет әйелге - 50 жастағы Криста Пайкқа қатысты өлім жазасы іске асырылады. Өлімге әкелетін инъекция салу арқылы орындалатын жаза 30 қыркүйекке белгіленді, деп хабарлайды Tengri Life Death Penalty Information Center-ге сілтеме жасап.

Қылмыстың мән-жайы

Қылмыс жасалған кезде Пайк 18 жаста болған. Іс материалдарына сәйкес, ол 17 жастағы сүйіктісі Тэдарил Шипппен және құрбысымен бірге 19 жастағы Коллин Слеммерді қараусыз қалған жасыл аймаққа алдап апарған. Пайк Слеммерді жігітін "тартып алмақ болды" деп күдіктенген.

Жарты сағат бойы қызды азаптаған. Пайк пен оның сыбайластары жәбірленушіге көптеген жарақат салып, кеудесіне пентаграмма ойып салған. Алған жарақаттарынан Слеммер көз жұмды. 1996 жылы сот Пайкты ең ауыр жазаға кесті, осылайша ол АҚШ тарихындағы өлім жазасына кесілген ең жас әйелдердің бірі болды.

Қылмыстың екінші қатысушысы Тэдарил Шипп кісі өлтіру кезінде кәмелетке толмағандықтан өлім жазасынан құтылып, өмір бойына бас бостандығынан айырылды.

Адвокаттар мен құқық қорғаушылар әлі де өлім жазасын тоқтатуға немесе оны өмір бойына бас бостандығынан айыру жазасына ауыстыруға тырысып жатыр. Қорғаушылардың апелляциясында Пайк балалық және жасөспірім шағында физикалық және жыныстық зорлық-зомбылықты бастан өткергені, сондай-ақ емделмеген ауыр психикалық ауытқу мен ми зақымдануынан зардап шеккені айтылған.

Сондай-ақ қорғаушы тарап нейробиологтардың заманауи зерттеуіне сүйенеді. Оған сәйкес, адам миының қалыптасуы 25 жасқа дейін жалғасады, сондықтан 18 жастағы қыздың эмоционалдық жағдайы кәмелетке толмаған баладан еш айырмашылығы болмаған.

Егер үкім орындалса, Пайк 1819 жылдан бері Теннесси штатында өлім жазасына кесілген алғашқы әйел болады.

Бұған дейін Мысырда тележүргізуші әрі продюсер Сара Халифа дарға асу арқылы өлім жазасына кесілген болатын. 39 жастағы әйел ірі есірткі трафигіне қатысты іс бойынша күдікті ретінде танылған.

Тағы оқыңыз: 30 жылға созылған жемқорлық: Қытайда шенеунік өлім жазасына кесілді

Бізді Google-дың негізгі дереккөздер тізіміне қосыңыз