7kun.KZ парақшасындағы ақпаратқа сәйкес, Qazaq24.com хабар таратты..
Қазақстан Үкіметі «Ақтау теңіз порты» арнайы экономикалық аймағының (АЭА) аумағын кеңейту туралы қаулы қабылдады.
Бұл туралы Маңғыстау облысы әкімдігінің баспасөз қызметі хабарлады.
Қаулыға сәйкес, АЭА аумағы Мұнайлы ауданындағы өнеркәсіптік аймақтан 187 гектар және «Ерсай Каспиан Контрактор» ЖШС-нен 382,6 гектар жер қосу арқылы ұлғайтылды. Нәтижесінде арнайы экономикалық аймақтың жалпы аумағы 10 384 гектарға жетті.
«Ақтау теңіз порты» АЭА Маңғыстау облысында орналасқан және Ақтау, Жаңаөзен қалалары мен Мұнайлы, Қарақия, Түпқараған аудандарын қамтиды.
Сонымен қатар, аймақтың жаңартылған аумақтық құрылымы бекітілді. Оның ішінде порттық аймақ – 1038 гектар, индустриялық аймақ – 7615 гектар, ал логистикалық аймақ 1730 гектарды құрайды.
Үкімет 2052 жылға дейінгі негізгі даму көрсеткіштерін де айқындады. Жоспар бойынша, жалпы инвестиция көлемі 1,7 трлн теңгеге жетіп, өндіріс көлемі 1703 млрд теңгені құрайды.
Сондай-ақ АЭА-ға қатысушы компаниялар саны 188-ге дейін өсіп, 9900 жаңа жұмыс орны ашылады деп күтілуде. Өндірістегі қазақстандық қамту үлесі 83 пайыз деңгейінде сақталады.
Қаулы қол қойылған күннен бастап күшіне енді.