Qazaq24.com, Sputnik.KZ дереккөзінен алынған ақпаратқа сүйене отырып жаңалық таратты..
АСТАНА, 21 тамыз – Sputnik. Астана қаласына жақын екі ауыл табиғи газға қосылды, деп хабарлайды Sputnik Қазақстан энергетика министрлігінің ресми сайтына сілтеме жасап.
Целиноград ауданында Қаражар және Қараөткел ауылдары 2028 жылға дейін газбен қамтылады деген жоспар болған. Алайда құрылыс-монтаж жұмыстары мерзімінен бұрын аяқталды. Оған қоса, екі ауыл да магистральдық құбырдың бойында орналасқан.
Осылайша, Қаражарда бес мыңға жуық адам табиғи газға қол жеткізсе, Қараөткелде 4 мыңнан астам отбасы көгілдір отынды пайдалана алады.
"Целиноград ауданының тұрғындарын табиғи газбен қамтамасыз ету жұмыстары жалғасып жатыр. Биыл Қызылсуат ауылында тиісті жоба жүзеге асырылып жатыр. Жұмыстар аяқталғаннан кейін 3 мыңға жуық тұрғын табиғи газға қол жеткізеді", - делінген ресми хабарламада.
Сонымен қатар Ақмол, Қабанбай батыр, Өтеміс, Қызылжар, Нұресіл және Қажымұқан ауылдарын газдандыру бойынша жобалық-сметалық құжаттама әзірленіп жатыр. Аталған жобаларды іске асыру 2027 жылға жоспарланған.