Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратады..
Астана тұрғыны полиция қызметкеріне дөрекілік көрсетіп, оны жылауға дейін жеткізген. Жақында елорданың қылмыстық істер жөніндегі ауданаралық соты билік өкілін қорлау туралы істі қарады, деп хабарлайды Tengrinews.kz тілшісі.
Оқиға осы жылдың көктемінде болған. Сот үкіміне сәйкес, қаланың 38 жастағы жұмыссыз тұрғыны мас күйінде "Чат-рулетка" қосымшасына кіріп, әртүрлі адамдармен сөйлесе бастаған. Бір сәтте байланысқа өзі туралы айта бастаған кішкентай бала шығады. Ер адам қосымшада балалардың отыруын дұрыс емес деп танып, 112 қызметіне қоңырау шалған. Алайда оған ешкім жауап бермеген соң, ол полицияға хабарласқан. Тұтқаны оператор қыз көтерген.
Сотта ол қоңырау шалған адамның 112 қызметінің неліктен жауап бермей жатқанын сұрағанын айтты. Оператор мұның себебін білмейтінін жеткізген. Содан кейін ер адам өзін басшылықпен байланыстыруды талап ете бастаған. Оператор мұндай мүмкіндіктің жоқтығын айтып, қоңырау шалу себебін және полиция көмегі қажет пе екенін сұраған. Осыдан кейін оның атына балағат сөздер жауған.
"Ол өзін жайсыз сезініп, қорланғанына намыстанды. Сотталушының сөздері балағат болғандықтан, ол тіпті реніштен жылап жіберген. Қазіргі уақытта сотталушы одан кешірім сұрады. Ол кешірімін қабылдағанымен, жазаны соттың қалауына қалдыруды сұрады", - делінген үкімде.
Соттық психологиялық-филологиялық сараптама қорытындысы ер адамның айтқан сөздерінде полиция қызметкерінің абыройы мен қадір-қасиетін қорлау белгілері,
полиция қызметкерінің қадір-қасиетіне нұқсан келтіретін, сондай-ақ әдепсіз сипаттағы сөздер қолданылғанын анықтаған. Сотталушы өз кінәсін толық мойындап, өкінетінін және сол сәтте мас болғандықтан не істеп жатқанын түсінбегенін мәлімдеді. Сонымен бірге ол тиісті жазасын алуға дайын екенін білдірді.
Сот оны кінәлі деп танып, 30 сағаттық қоғамдық жұмыстарға тартты. Егер ол бұл жұмыстан жалтарса, өтелмеген төрт сағат үшін бір тәулік қамауға алу жазасы қолданылуы мүмкін. Сондай-ақ одан Жәбірленушілерге өтемақы қорына 21 625 теңге көлемінде мәжбүрлі төлем өндірілді.
Бұған дейін Атырауда АИТВ-ның алдын алу жөніндегі облыстық орталық директоры мен орынбасары арасындағы еңбек дауы сотқа дейін жеткені туралы хабарлаған болатынбыз. Орынбасары басшының оны жұрт алдында "т..." және "сауатсыз" деп балағаттағанын айтқан. Осыдан кейін бұл сөздердің шынымен айтылған-айтылмағанын сот анықтады.
Google News арқылы жаңалықтарымызды қадағалаңыз
Жазылу