Астаналықтар балалар алаңындағы әскери суреттерге наразы болды: әкімдік жауап берді

Астана тұрғындары тұрғын үй кешендері біріндегі балалар алаңының ерекше безендірілуіне назар аударды. Ойын конструкциялары әскери техника, ұшақтар мен соғыс қимылдарының суреттерімен безендірілген. Бұл суреттер әлеуметтік желілерде қызу пікірталас тудырды, деп хабарлайды Tengrinews.kz тілшісі.

Талқылау әлеуметтік желіде басталды, онда қолданушылардың бірі балалар алаңының суреттерін жариялап, балаларға арналған кеңістікте мұндай тақырып қаншалықты орынды екеніне күмән келтірді.

"Балалар күн сайын алаңда соғысқа арналған суреттерді не үшін көруі керек?" - деп жазды жарияланым авторы.

Threads-тен скриншот

Суреттерден жарылыстар мен қираған ғимараттар арасындағы қарулы сарбаздарды, әскери тікұшақтар мен ұшақтардың суретін көруге болады.

Жарияланым желі қолданушылары арасында екіұдай пікір тудырды. Бірі суреттерді алып тастауды талап етсе, енді бірі безендіруден ешқандай оғаштық көрмеген.

"Көршілермен шығып, мына сұмдықтың үстін бояп тастаңыздар", - деп ұсынды қолданушылардың бірі.

"Шу шығару керек! Бұл не деген сұмдық? Сенбеймін, шынымен солай ма?" - деп кейіді тағы бірі.

Дегенмен, мұндай безендіруді жақтап шыққандар да табылды.

"Әрқашан танк суретін салатынбыз. Мұның несі мәселе? Ертең Call of Duty (танымал компьютерлік ойын - ред. еск.) қатыгездікті дамытады дейсіз бе?" - деп жазды пікір қалдырушылардың бірі.

Тағы бір қолданушы балалық шағын еске алып, құрастырмалы ұшақ модельдері мен әскери ойындарға әуес болғанын айтты.

"Негізі бұл өте әсерлі көрінеді. Ұл балаларға мұндай суреттер ұнайды. Мен бала кезімде желімдейтін ұшақ модельдеріне қатты қызығатынмын. Сондай-ақ "Зарница" ойынының түрлі нұсқасын ойнау керемет болатын", - деп бөлісті ол.

Жағдайға қатысты Есіл ауданының әкімдігі пікір білдірді. Мәселе Сығанақ көшесі, 39/1 мекенжайындағы балалар алаңы туралы болып отырғаны белгілі болды.

Әкімдік мәліметінше, ойын құрылғылары 2021 жылы жобалық-сметалық құжаттамаға сәйкес орнатылған.

"Элементтер балаларға қызықты әрі әртүрлі ойын кеңістігін жасау мақсатында қарастырылған. Кіші сәулеттік формалар тікұшақ пен кеме тақырыбында орындалған", - деп хабарлады әкімдік.

Сондай-ақ онда ойын кешендерінің техникалық стандарттар мен талаптарға сай екені атап өтілді. Оларды таңдау және орнату кезінде негізгі назар осы сипаттамаларға аударылған.

Суреттер боялғаннан кейінгі алаң элементтері бірінің фотосы. Дереккөз: Есіл ауданының әкімдігі

Дегенмен тұрғындардың наразылығынан кейін аудан билігі алаңның безендірілуін өзгерту туралы шешім қабылдады.

"Тұрғындардың пікірін ескере отырып, аталған суреттердің үсті боялды", - деп хабарлады аудан әкімдігі.

Бұған дейін Алматыдағы "Кәусар" ТК тұрғыны қасбеттік жарықтандыруға шағымданған болатын, оның айтуынша, кейінгі бір жылда жарықтандыру жүйесі үш рет өртенген. Бұл жағдайға Алматы қалалық ТЖД жауап берді.

Бізді Google-дың негізгі дереккөздер тізіміне қосыңыз