Qazaq24.com, Sputnik.KZ дереккөзінен алынған ақпаратқа сүйене отырып мәлімет бөліседі..
АСТАНА, 28 маусым-Sputnik. ҚР Атом энергиясы жөніндегі агенттігінің төрағасы Алмасадам Сәтқалиев IV халықаралық жастар ядролық "Обнинск NEW" форумы аясында өткен "Өзгермелі әлемдегі атом энергетикасы: ынтымақтастықтың жаңа мүмкіндіктері" атты жоғары деңгейдегі сессияға қатысты.
Алмасадам Сәтқалиев өз сөзінде Қазақстандағы атом энергетикасын дамыту – алдыңғы буын ғалымдарының ғылыми мұрасына, отандық және кеңестік ғылыми мектептердің жетістіктеріне, сондай-ақ еліміздің жинақтаған ғылыми-техникалық және өнеркәсіптік әлеуетіне негізделген дамудың заңды әрі эволюциялық кезеңі екенін атап өтті.
Ол Қазақстан әлемдегі ең ірі уран қорларының біріне ие екенін, табиғи уран өндіру бойынша әлемдік көшбасшы саналатынын, сондай-ақ Ақтаудағы БН-350 жылдам нейтронды реакторын салу, пайдалану және пайдаланудан шығару бойынша бірегей тәжірибе жинақтағанын айтты. Сонымен қатар елімізде дамыған ғылыми-зерттеу инфрақұрылымы қалыптасқан.
"Агенттік төрағасы елімізде атом энергиясын бейбіт мақсатта пайдалану саласында елеулі ғылыми әлеует қалыптасқанын атап өтті. Ұлттық ядролық орталық пен Ядролық физика институтында ғылыми-зерттеу реакторлары, үдеткіш кешендері және ғылыми зерттеулер жүргізу және заманауи ядролық технологияларды дамыту үшін қажетті тәжірибе бар. Сонымен қатар Қазақстан Атом энергиясы жөніндегі халықаралық агенттікпен (АЭХА), халықаралық ғылыми-зерттеу орталықтарымен және шетелдік серіктестермен ынтымақтастықты белсенді түрде дамытып келеді", - делінген хабарламада.
Алмасадам Сәтқалиевтің айтуынша, саланы дамытудың келесі табиғи кезеңі Қазақстанда атом энергетикасын жандандыру болып табылады. Осыған байланысты еліміздің энергетикалық әлеуетін одан әрі дамыту үшін стратегиялық маңызы бар алғашқы атом электр станциясын салу жобасы іске асырылуда.
Сөзін қорытындылай келе, Алмасадам Сәтқалиев Қазақстанның халықаралық ынтымақтастықты одан әрі дамытуға, ғылыми әлеуетті тиімді пайдалануға және орнықты даму мен жаһандық энергетикалық қауіпсіздікті нығайту мақсатында заманауи технологияларды енгізуге ашық екенін атап өтті.