Аты жөнін атады : Астанада қазақстандықты әскери комиссариат атын жамылғандар алып кетпек болды

Қазақстандық азамат Астанада өзін әскери комиссариат қызметкері ретінде таныстырған ер адамдармен күмәнді кездесуі туралы айтып берді. Ол оқиға туралы әлеуметтік желіде жазды. Қорғаныс министрлігі жағдайға қатысты пікір білдірді, ал полиция тексеріс бастады, деп хабарлайды Tengrinews.kz тілшісі.

Не болды?

Оқиға туралы жазба танымал әлеуметтік желіде жарияланды. Басылым авторының айтуынша, үйінің маңында жұбайы екеуіне екі ер адам келген. Олар оның аты-жөнін атап, әскери комиссариаттан келгендерін айтқан. Содан кейін бейтаныс адамдар ер адамнан олармен бірге жүруін сұраған.

Скриншот: Threads

Ер адам әскери қызметке жарамсыздығы туралы анықтамасы бар екенін түсіндірген, алайда бейтаныс адамдар райынан қайтпаған.

"Бірнеше минуттан соң тағы бір ер адам пайда болып, үшеуі бізді қоршап алды. Камераны көре салысымен беттерін жасыра бастады, ал мен: "Полиция шақыр!" – деп айғайлағанда, олар жан-жаққа қаша жөнелді. Сондай-ақ маған телефон арқылы шақырту келді-мыс деп айтты, бірақ кейінгі 4 жыл ішінде маған ештеңе келмеген еді", - деп жазды жазба авторы.

Қазақстандық бұл ер адамдар расында әскери комиссариат қызметкерлері болғанына күмән келтірді. Оның айтуынша, оларда өкілеттіктерін растайтын ешқандай құжат болмаған.

Жазба авторын, әсіресе, бейтаныс адамдардың оның аты-жөнін білетіні алаңдатқан. Сонымен қатар жұмыс орны мен үйге қайтар жолын қайдан білетіні сұрақ туындатқан.

Астана полиция департаменті "Нұра" аудандық полиция басқармасы тексеріс жүргізіп жатқанын хабарлады.

"Ер адамдардың жеке басы анықталып жатыр. Тексеріс нәтижесі бойынша олардың іс-әрекетіне құқықтық баға беріліп, заңнама аясында тиісті шаралар қабылданады", - деді полиция өкілдері.

Қорғаныс министрлігі шақыру науқаны кезінде әскери комиссариат пен әкімдік өкілдері полиция қызметкерлерімен бірлесіп, әскерге шақырылушылардың жүрген жерін анықтау бойынша іс-шаралар жүргізе алатынын түсіндірді.

"Азаматтарды тексеру кезінде полиция қызметкері өзін таныстырып, қызметтік куәлігін көрсетуге міндетті. Осыдан кейін әкімдік немесе әскери комиссариат өкілдері тиісті деректер қоры бойынша азамат туралы мәліметтерді тексереді", - деп атап өтті ведомство.

Қорғаныс министрлігі қазақстандықтарды бейтаныс адамдарға жеке мәліметтерін бермеуге және өкілеттіктері расталмаған жағдайда олардың талаптарын орындамауға шақырды. Егер іс-әрекеттердің заңдылығына күмән туындаса, 102 нөмірі арқылы полицияға хабарласу қажет.

Бұған дейін ұқсас жағдай Алматыда болған еді. Онда белгісіз ер адам өзін Қорғаныс министрлігінің қызметкері ретінде таныстырып, өтіп бара жатқандардан тіркелген мекенжайын білмек болған.

Тағы оқыңыз: “Шақырту алдыңыз ба“: Қазақстанда 2026 жылғы күзгі әскерге шақыру туралы нені білу керек?

Бізді Google-дың негізгі дереккөздер тізіміне қосыңыз