Атырауда референдум қарсаңында үшем туған аналар таңдау жасады

Перинаталдық орталықта орналасқан №22 жабық референдум учаскесінде үшемдердің аналары да дауыс беріп, өз таңдауын жасады. Солардың бірі – үшемнің анасы Гүлшат Аханова.

Атырау қаласына қарасты Ақжар ауылының тұрғыны Гүлшат Аханованың отбасында бұған дейін үш қызы болған. Үшем қыздардың дүниеге келуімен олардың шаңырағында алты қыз бала өсетін болды. Сәбилерге Нұриля, Сабира және Хадия деген есім берілмек.

– Еліміздің болашағы үшін, қыздарымыздың болашағы үшін бүгін дауыс бердім, – дейді жас ана.

Референдум қарсаңында дүниеге келген тағы бір үшемнің анасы – Айдана Ерғалиева. Оның отбасында үш ұл өмірге келді.

Дәрігерлердің айтуынша, аналар мен нәрестелердің жағдайы қанағаттанарлық, тиісті медициналық бақылауда.

Қуанышты оқиға перинаталдық орталық ұжымы үшін де есте қаларлық сәт болды. Референдум қарсаңында дүниеге келген алты сәбидің өмірге келуі жаңа өмірдің бастауындай жарқын белгі ретінде қабылданды.

Бұған дейін Теңіз кен орнында жұмыс істейтіндер дауыс беріп жатқанын жазған едік.