Sputnik.KZ парақшасындағы ақпаратқа сәйкес, Qazaq24.com хабар таратты..
АСТАНА, 19 ақпан – Sputnik. "Семей халықаралық әуежайы" жауапкершілігі шектеулі серіктестігіне айыппұл салынды, деп хабарлайды бәсекелестікті қорғау және дамыту агенттігі.
Тергеп-тексеру барысында кәсіпорынның бөлшек саудада авиаотын бағасын қымбаттатқаны белгілі болды.
Департамент әкімшілік іс қозғады. Іс Семей қаласының әкімшілік құқық бұзушылықтар жөніндегі мамандандырылған ауданаралық сотында қаралды.
"ЖШС кінәлі деп танылып, 8,8 млн теңге мөлшерінде әкімшілік айыппұл салынды. Сондай-ақ монополистік қызмет нәтижесінде алынған 8,5 млн теңге көлеміндегі монополиялық кіріс тәркіленді", - дейді бәсекелестікті қорғау және дамыту агенттігінде.
Қаулыға шағым жасалғанымен, Абай облыстық сотының қылмыстық істер жөніндегі сот алқасы қаулыны өзгеріссіз қалдырды. Сот қаулысы заңды күшіне енді.