Sputnik.KZ парақшасынан алынған деректерге сүйене отырып, Qazaq24.com жаңалық жариялайды..
АСТАНА, 21 шілде – Sputnik. Өнеркәсіп және құрылыс министрі Ерсайын Нағаспаев халық үшін автокөліктің қолжетімділігін арттыру мақсатында қолға алынатын шаралар туралы айтты, деп хабарлайды Sputnik Қазақстан.
Үкімет отырысында көлік жасау саласын дамыту мәселелері қаралды. Жиында министр автокредит рәсімдеу кезінде борыштық жүктеме коэффициентін алып тастау ұсынылып отырғанын мәлімдеді. Негізгі мақсат – азаматтардың автокөлік сатып алу мүмкіндігін кеңейту.
"Қазіргі жеңілдік жыл соңына дейін сақталады. Біз үкіметке оны ұзарту туралы ұсыныс енгіздік. Ұлттық банк те қолдаса екен дейміз. Әзірге бұл ұсынысты қолдап отырған жоқ. Алайда мәселені әрі қарай пысықтаймыз", – деді Нағаспаев брифингте.
Министрдің айтуынша, бастама қолдау тапқан жағдайда автокредит беру кезінде азаматтың борыштық жүктеме коэффициенті есепке алынбауы мүмкін.
Айта кетері, Қазақстанда кредит беру тәртібі өзгерді. Жаңа талаптарға сәйкес, тұрақты табысы жоқ азаматтарға кредит беруге шектеу қойылады. Сондай-ақ қарыз жүктемесі коэффициенті мен ай сайынғы төлемнің табысқа қатынасы ескеріледі.