Аятолла Хаменеи тірі, оны жасырып отыр : жаңа конспирологиялық нұсқа тарады

Иранның жоғарғы көшбасшысы аятолла Әли Хаменейдің қаза тапқаны туралы ресми мәлімдемеден кейін күтпеген жерден жаңа конспирологиялық пікірлер тарай бастады. Кейбір сарапшылар мен интернет қолданушылары Хаменей шын мәнінде тірі болуы мүмкін деген болжам айтып отыр, деп хабарлайды Arasha.kz.

Ресми мәліметке сәйкес, Иранның рухани көшбасшысы 28 ақпанда Тегерандағы резиденциясына жасалған Израиль зымырандық шабуылы кезінде қаза тапқан. Осы оқиғадан кейін елде бір апталық аза тұту жарияланды.

Билік өкілдері қоштасу рәсімі 4 наурызда басталып, үш күнге созылатынын, кейін Хаменей туған қаласы Мешхедте жерленетінін хабарлаған. Алайда күтпеген жерден бұл рәсім кейінге қалдырылып, нақты күні белгісіз болып қалды.

Осы жағдай түрлі болжамдардың пайда болуына себеп болды. Әсіресе шетелдік форумдар мен әлеуметтік желілерде "Хаменей шын мәнінде тірі" деген пікірлер талқыланып жатыр.

Конспирологияға сенетіндер бірнеше жайтты алға тартады. Олардың айтуынша, АҚШ пен Израильдің негізгі мақсаты Иранның жоғарғы көшбасшысын жою болған. Сондықтан оның жақтастары Хаменейді қауіпсіз жерде жасырып, өлімі туралы ақпаратты әдейі жариялауы мүмкін.

Тағы бір күмән тудырған жағдай – жаңа жоғарғы көшбасшыны сайлау нәтижесінің әлі жарияланбауы. Иран заңына сәйкес, жаңа көшбасшыны 88 дін ғалымынан тұратын Сарапшылар кеңесі сайлауы тиіс.

Сонымен қатар кейбір деректерде Хаменейдің орнына оның ұлы Моджтаба Хаменей келуі мүмкін деген ақпарат тараған. Алайда бұл мәлімет ресми түрде расталмаған.

Бұған қоса Израиль әскері Тегеранда орналасқан Хаменейдің жасырын бункеріне 50 ұшақ жүзге жуық бомба тастағанын мәлімдеген. Кейбір сарапшылар мұндай ауқымды операцияның өзі түрлі сұрақ туғызатынын айтып отыр.

Дінтанушы Сергей Худиевтің айтуынша, мұндай теориялардың тарауына шииттік исламдағы белгілі бір сенім де әсер етуі мүмкін.

Шииттік дәстүрде "жасырын имам" туралы түсінік бар. Бұл сенім бойынша IX ғасырда өмір сүрген Мухаммад ибн әл-Хасан әл-Махди көзден ғайып болған, бірақ өлмеген. Ол белгілі бір уақытта қайта оралып, әлемде әділет орнатады деген сенім бар.

Сарапшылардың пікірінше, дәл осындай тарихи және діни түсініктер Хаменей туралы түрлі аңыздар мен болжамдардың пайда болуына ықпал етуі мүмкін.

Дегенмен қазіргі уақытта Иран билігі Хаменейдің қаза тапқанын ресми түрде растаған, ал оның тірі екені туралы ақпарат дәлелденген жоқ.