7kun.KZ дереккөзінен алынған мәліметтерге сүйене отырып, Qazaq24.com түсініктеме жасады..
Алматыдағы ірі сауда нысандарының бірі – «Байсат» базары алдағы уақытта қала әкімдігінің коммуналдық меншігіне берілуі ықтимал.
Бұл туралы Орталық коммуникациялар қызметінде өткен брифингте Қаржы министрлігі Мемлекеттік мүлік және жекешелендіру комитетінің төрағасы Нұрмахан Әділбеков мәлімдеді.
Оның айтуынша, мемлекет меншігіне қайтарылған нысанды сату мақсатында бірнеше мәрте аукцион ұйымдастырылғанымен, сатып алушылар тарапынан қызығушылық болмаған.
– Нысан бірнеше рет саудаға шығарылды. Алайда инвесторлардан өтінім түскен жоқ. Бұл сұраныстың төмендігімен немесе мұндай көлемдегі қаражатқа ие инвесторлардың аздығымен байланысты болуы мүмкін. Егер алдағы уақытта да сатылмаса, оны Алматы қаласы әкімдігінің коммуналдық меншігіне беру мәселесі қаралады, – деді комитет төрағасы.
Соңғы рет базар үлесі биыл мамыр айының соңында аукционға қойылған. Алайда қатысушылар болмағандықтан, сауда өткізілмеген деп танылды.
Мемлекет нысанды сатуға бірнеше мәрте әрекет жасаған. Алғашында «Байсат» базары 28,6 млрд теңгеге бағаланса, кейін оның құны 26,7 млрд теңгеге дейін төмендетілді. Ал 2026 жылдың қаңтарында бастапқы баға тағы қысқартылып, 24,7 млрд теңгеге ұсынылды.
«Байсат» базары бұған дейін Қайрат Сатыбалдының ұлы Бауыржан Нұрсұлтанмен байланысы бар компаниялардың басқаруында болған. Тергеу барысында Қайрат Сатыбалды нысанның негізгі бөлігін мемлекетке өз еркімен қайтарған. Ал ұлына қатысы бар компаниялардың үлесі сот шешімімен тәркіленіп, мемлекет меншігіне өтті.
Құқық қорғау органдары жүргізген тергеу кезінде базардың өткен жылдары заң талаптарын бұза отырып және төмендетілген бағамен жекешелендірілгені анықталған.
Еске салсақ, 2022 жылы Қайрат Сатыбалды аса ірі көлемдегі қаржы жымқыру ісі бойынша 6 жылға бас бостандығынан айырылған еді. Кейін мемлекетке құны жүздеген миллиард теңгені құрайтын түрлі активтерді қайтарды. Олардың қатарында тұрғын үйлер, әкімшілік ғимараттар, акциялар, зергерлік бұйымдар және инфрақұрылымдық нысандар бар.
Ал 2024 жылдың тамыз айында сот шешімімен оның жазасының өтелмеген бөлігі бас бостандығын шектеу жазасына ауыстырылған болатын.