Tengrinews.KZ парақшасындағы деректерге сәйкес, Qazaq24.com ақпарат таратты..
Ұшақта орын алмастыру туралы өтініш кейде бортта жанжалға ұласып жатады. Кейбір жолаушылар орнын беруге дайын болса, енді біреулері оларды ұятқа қалдыруға тырысып жатқанның өзінде бас тартады. Tengri Travel орын ауыстырудан бас тарту неге жолаушының заңды құқығы екенін және өз бетінше орын ауыстыру бүкіл рейс үшін қандай салдарға әкеп соғуы мүмкін екенін анықтап көрді.
"Түсіністікпен қарау соншалықты қиын ба?"
Әлеуметтік желі қолданушысы ұшу кезінде орын ауыстырмақ болған сәтсіз әрекеті туралы айтып берді. Оның айтуынша, ол баласымен бірге ұшқан және 14-қатарда отырған жолаушыға барған. Әйел баласының қасында отыру үшін оған 8-қатардағы өз орнын ұсынған, бірақ бас тарту жауабын алған.
"Ұшақта бір қыздан баламен қатар отыру үшін орын ауыстыруын сұрадым. Оған тек бірнеше қатар артқа ауысу керек еді, бірақ ол бұл орынды арнайы таңдағанын айтып, бас тартты. Мен, әрине, таласқан жоқпын, бірақ мүлдем түсінбедім. Бәрібір бір уақытта ұшып келесіздер ғой, 8-ші не 14-ші қатар болғанында қандай айырмашылық бар? Балалы анаға түсініктікпен қарау соншалықты қиын ба?", - деді жолаушы.
Скриншот: Threads
Бұл жазба 500 мыңнан астам қаралым жинады. Пікір қалдырғандардың көпшілігі орын ауыстырудан бас тартқан жолаушыны қолдады. Көбісі егер орынды арнайы таңдап, бәлкім, ол үшін қосымша ақы төлесе, басқа адам одан бас тартуға міндетті емес екенін еске салды.
Желі қолданушылары ұқсас оқиғаларын да бөлісті:
"Бірде үйге ұшып бара жатқанымда, кішкентай қызы бар ана меннен орын ауыстыруды сұрады, себебі баласы терезеге қарағанды жақсы көреді екен. Мен бас тарттым. Сол әйел ұшудың барлық 4 сағаты бойы маған алая қарап, ашуланып, өзіне ыңғайсыз екенін айтып, менен бірдеңе талап етпек болды. Ал мен құлаққапты тағы алдым да, сапардан ләззат алдым! P.S. Егер балаңыз бірдеңені жақсы көрсе, бұл туралы алдын ала қамданыңыз!". "Егер бұл сіз үшін расында маңызды болса, қатар орналасқан орындарды алдын ала сатып алар едіңіз. Қыз дұрыс істеген, сізге ешкім ештеңе міндетті емес". "Орын үшін қосымша ақы төлеу керек пе? Жоқ. Ыңғайлы орын үшін ақша төлеген адамға ренжу керек пе? Иә!". Неге орынды өз бетінше ауыстыруға болмайды?Бір қарағанда, жолаушылар орын ауыстыра салса, ештеңе болмайтындай көрінеді. Алайда ұшақтағы орын - тек жеке жайлылық мәселесі емес. Жолаушыларды отырғызу ұшу қауіпсіздігіне, жолаушылар есебіне және әуекомпаниясының талаптарына байланысты.
Біріншіден, бұл қауіпсіздік ережелеріне қатысты. Мысалы, Scat әуекомпаниясы жолаушыларды отырғызу ИКАО талаптары мен қауіпсіздік нормаларын ескере отырып жүргізілетінін, сондықтан орындарды өз бетінше ауыстыру ұсынылмайтынын атап өткен болатын.
"Жолаушылар салонға қауіпсіздік талаптарын ескере отырып орналастырылады. Мысалы, ерекше қажеттіліктері бар жолаушылар арнайы қарастырылған орындарға отырғызылуы мүмкін. Сондай-ақ төтенше жағдай кезінде эвакуациялау және адамдарды орналастыру ережелерін сақтау қажет. Сонымен қатар салон ішіндегі орындар тіркеу жүйесінен өтетін билетте көрсетілген деректерге байланысты болады. Егер жолаушы орнын ауыстырса, бұл түсініспеушілікке әкеп соғуы және есепке алу мен қауіпсіздікке қатысты мәселелер тудыруы мүмкін", - деп хабарлады баспасөз қызметі.
FlyArystan да бұған дейін отырғызу кезінде, атап айтқанда, ұшақ тепе-теңдігі, апаттық шығу жолдарының орналасуы және эвакуация талаптары ескерілетінін түсіндірген.
"Халықаралық қауіпсіздік талаптарына, сондай-ақ біздің әуе компаниямыздың ережелеріне сәйкес, барлық жолаушы отырғызу талонында көрсетілген орындарға отыруға міндетті. Басқа орынды оның иесінің келісімінсіз және экипажды хабардар етпестен иеленуге жол берілмейді. Егер сіздің орныңызды басқа жолаушы иеленіп алса, бортсеріктерге жүгіну қажет, олар жолаушыдан өзінің отырғызу талонында көрсетілген орынға ауысуын сұрайды", - деп хабарлады баспасөз қызметі.
Егер жолаушы отырғызу талонында көрсетілген орынға отырудан бас тартса, экипаж әуекомпаниясының ережелері мен заңнамаға сәйкес шаралар қолдануы мүмкін.
Сондықтан, егер орын ауыстырғыңыз келсе, алдымен бортсерікке жүгінген дұрыс. Экипаж жағдайды бағалап, егер ауысу мүмкін болса, оны дұрыс ұйымдастыруға көмектеседі.
Кейде бұл күрделі мәселелер тудыруы мүмкінБұдан бөлек, сирек кездесетін себеп те бар: кейбір жолаушылар қуғыннан жасырыну үшін орын ауыстыруға тырысады.
Мұндай жағдайға 2024 жылы қазақстандық блогер Әнел Германиядан Испанияға ұшқан кезде тап болды. Бір ер адам баласына жақын отырғысы келетінін айтып алдап, одан орнын беруді сұраған. Бас тарту жауабын алса да, ол басқа жолаушыны көндіріп, кейін бұл әрекетін тағы бірнеше рет қайталаған.
@anelqyzzапат болған жағдайда сіздерді орындарыңыз бойынша анықтайды
♬ түпнұсқа дыбыс - тгк: Фриканеля
Ұшақ қонғаннан кейін салонға полицейлер кірді. Олар құжат бойынша әлгі ер адамға тиесілі орынға барды, бірақ оның үнемі орын ауыстыруына байланысты ол жерде жоқ болып шықты. Тәртіп бұзушыны табу үшін полиция қызметкерлеріне борттағы әрбір адамның паспортын тексеруге тура келді.
Нәтижесінде жолаушылар ұшақ ішінде тағы үш сағат отыруға мәжбүр болды.
Сонымен, мәселе кімнің қайда отырғысы келетінінде ғана емес. Өз бетінше орын ауыстыру экипаж мүшелерін шатастырып, ал төтенше жағдайда айтарлықтай қиындықтар тудыруы мүмкін. Сондықтан ең тиімді әрі қарапайым жол - орын ауыстырмас бұрын бортсеріктен сұрау.
Google News арқылы жаңалықтарымызды қадағалаңыз
Жазылу