Баламалы энергетика жөніндегі заң жобасын қарайды

Келесі сәрсенбіде депутаттар Жоғары аудиторлық палата Төрағасы Әлихан Смайыловтың ғылымды дамытуға бөлінген қаражаттың пайдаланылуы және жер қойнауын пайдаланушылардың міндетті аударымдары есебінен ғылыми-зерттеу және тәжірибелік-конструкторлық жұмыс­тарды қаржыландыру тетігінің тиімділігіне жүргізілген мемлекеттік аудит қорытын­дылары туралы есебін тыңдайды.

Күн тәртібіне баламалы энергетиканы дамытуға қатысты заң жобасы да енгізілді. Құжат электр энергиясын жинақтау жүйе­лерін бірыңғай электр энергетикалық жү­йеге қосудың құқықтық негіздерін қалып­тастыруды көздейді.

Сондай-ақ инвесторлардың мүдделерін қорғау және жаңартылатын энергия көздері нарығын дамыту мақсатында бизнес субъектілері арасындағы келісімдер жасасу тетігін жетілдіру ұсынылады. Заң жобасында жел, күн және геотермалдық энергияны пайдалану мәселелері қам­тылған. Бұдан бөлек, баламалы энергетика технология­ларын жылумен жабдықтау саласына енгізу көзделеді.

Аталған бастамалар Мемлекет басшы­сының «Жаңа тарихи кезеңдегі Қазақ­станның өзекті міндеттері» атты Қазақстан халқына Жолдауында белгіленген энер­гетикалық қауіпсіздікті нығайту, цифрлан­дыруды жеделдету және технологиялық дамуды қамтамасыз ету жөніндегі міндет­терді іске асыру аясында әзірленген.

Құрылтай отырысының күн тәртібіне Халықаралық жүк тасымалдау шарты туралы конвенцияны және оған электрон­дық жүкқұжатқа қатысты Қосымша хат­та­маны ратификациялау туралы екі заң жо­басы да енгізілді.

Конвенция халықаралық жүк тасы­малдау шарттарын жасасу мен орындаудың бірыңғай қағидаларын белгілеп, тасымал­даушылардың жауапкершілігін реттейді. Оны ратификациялау Қазақстанның халықаралық көлік-логистика саласын­дағы ынтымақтастығын нығайтуға және жүк тасымалдау рәсімдерін біріздендіруге мүм­кіндік береді.

Ал электрондық жүкқұжатқа қатысты Қосымша хаттаманы ратификациялау халықаралық автомобиль тасымалында электрондық құжат айналымын енгізудің құқықтық негізін қалыптастырады. Бұл жүк тасымалдау рәсімдерін цифрлан­дыруға, бақылау уақытын қысқартуға, сондай-ақ құжаттарды басып шығару мен өңдеуге жұмсалатын шығындарды азайтуға мүмкін­дік береді. Нәтижесінде отандық автокөлік кәсіпорындарының бәсекеге қабілеттілігі артады.

Бюро отырысында Құрылтай депутат­тарының заңдарға мониторинг жүргізу қағидалары да қаралды. Сонымен қатар бюро Конституциялық заңнама, сот жүйесі және құқық қорғау органдары комитетіне Біріккен Ұлттар Ұйымының Кибер­қылмысқа қарсы конвенциясы бойынша қорытынды әзірлеуді тапсырды. Құжат ақпараттық-коммуникациялық жүйелерді пайдалану арқылы жасалатын қылмыстар­дың алдын алуға, сондай-ақ мемлекеттердің осы бағыттағы халық­аралық ынтымақ­тастығын нығайтуға бағыт­талған.