Inform.KZ парақшасынан алынған деректерге сүйене отырып, Qazaq24.com жаңалық жариялайды..
Ағымдағы жылдың маусым айынан тамыз айына дейін Алматы – Балқаш – Алматы бағыты бойынша тікелей әуе рейсі ашылады.
– Рейстерді SKAT Airlines әуе компаниясы аптасына бес рет орындайды. Бағытта сыйымдылығы 50 жолаушыға дейінгі Bombardier CRJ200 ұшақтары пайдаланылады. Бір бағыттағы билет құны 16 мың теңгені құрайды, – деп хабарлады Қарағанды облысының жолаушылар көлігі және автомобиль жолдары басқармасында.
Осы кезеңде Астана – Балқаш – Астана бағыты бойынша күнделікті әуе қатынасы да жолға қойылады. Тасымалдаушы QAZAQ Air әуе компаниясы болады, ол сыйымдылығы 78-ден 86 жолаушыға дейінгі Bombardier Dash 8 Q400 әуе кемелерін пайдаланады. Бұл бағыттағы билет құны да бір бағытқа 16 мың теңгені құрайды.
Екі бағыт та мемлекет тарапынан субсидияланады. Рейстерді іске қосу өңірдің көлік қолжетімділігін арттыруға және Балқаштың туристік әлеуетін дамытуға бағытталған. Бұл өз кезегінде болашақта туристер ағынын көбейтіп, инвестиция тартуға ықпал етеді деп күтілуде.
Бұған дейін Астана мен Ақтаудан Ереванға жаңа әуе рейстерін ашу жоспарланып отырғаны хабарланған болатын. Бұл Қазақстан Республикасының көлік министрі Нұрлан Сауранбаев пен Армения Республикасының аумақтық басқару және инфрақұрылым министрі Давид Худатянның кездесуі барысында ынтымақтастық әлеуетін талқылаудан кейін белгілі болды.