Qazaq24.com, Sputnik.KZ дереккөзінен алынған ақпаратқа сүйене отырып жаңалық таратты..
АСТАНА, 27 тамыз – Sputnik. Шығыс Қазақстан облысында мемлекеттік бағдарлама арқылы баспана алуға көмектесуге уәде берген алаяқтық схемасы әшкереленді, деп хабарлайды Polisia.kz.
Өскемен тұрғыны азаматтарға пәтерлерді тиімді бағамен ұсынып, оларды рәсімдеу жұмыстарын өз мойнына алатынын айтқан.
Тергеу мәліметтеріне сәйкес, 30 жастағы ер адам 2024 жылдың қарашасынан 2026 жылдың сәуіріне дейін әрекет еткен. Ол адамдарды өзіне қолма-қол ақша беруге және банк шоттарына ақша аударуға көндірген. Ақша алғаннан кейін тұрғын үйді тіркеу, құжаттарды рәсімдеу және басқа да төлемдер үшін қосымша шығындар қажет екенін айтып, жаңа талаптар қойған.
"Жәбірленушілерді мәміленің шынайылығына түпкілікті сендіру үшін ер адам пәтер жалдап, оны олардың болашақ баспанасы ретінде көрсеткен. Азаматтар жақын арада баспананың кілтін аламыз деген үмітпен ақша беруді жалғастырған", - деп жазылған хабарламада.
Алайда уәде етілген баспана мен құжаттарды олар сол күйі ала алмаған. Алаяқтың әрекеттен облыстың 25 тұрғыны зардап шеккен. Келтірілген жалпы шығын көлемі 186 млн теңгеден асады.
Күдікті ұсталып, полицияға жеткізілді. Қазіргі уақытта ол уақытша ұстау изоляторында және жауап алу барысында өз кінәсін мойындады.