Батыр туралы 10 томдық

Egemen.KZ парақшасындағы ақпаратқа сәйкес, Qazaq24.com хабар таратты..

Аты аңызға айналған қазақтың хас батыры Бауыржан Момышұлының туғанына бүгін 115 жыл толды. Осы қарсаңда қаһарман тұлға туралы 10 томдық еңбек жарық көрді. Кітаптың авторы – белгілі жазушы, профессор Мамытбек Қалдыбай.

Бауыржан Момышұлы соғыстың алғашқы кезінің өзінде-ақ Александр Бектің әйгілі «Волоколамское шоссе» атты кітабының басты кейіпкеріне айналып, әлем жұртына кеңінен танылды. Оның қолбасшылық қабілеті мен әскери тәсілі әлемдік соғыс өнеріне «Момышұлы спиралі» деген атаумен енді. Тіпті АҚШ, Куба, Израиль және Никарагуаның әскери академиялары Бауыржан Момышұлының соғыс кезіндегі тәжірибесін зерттеп, оны стратегиялық және тактикалық оқу құралы ретінде пайдаланды.

Бауыржан Момышұлы әскери қызметтен соң да ерлік көрсетті, жазушылықпен айналысты. «Офицер күнделігі», «Бір түннің тарихы», «Москва үшін шайқас», «Генерал Панфилов», «Ел басына күн туса» секілді талғампаз оқырманның көңілінен шыққан көптеген кітап пен әскери естелік жазды. Ақтық деміне дейін қайсарлық танытты, жастарды отаншылдыққа, ұлтжандылыққа тәрбиеледі.

Батыр туралы 10 томдық кітаптың авторы Мамытбек Қалдыбай жиырма жылдан астам Бауыржан Момышұлымен қоян-қолтық араласып, оның сұрапыл соғыс пен даңқты қолбасшылар, атақты замандастары жөніндегі әңгімелерін жалықпай тыңдады. Ерекше мінез-құлқына терең үңіліп, жұртқа беймәлім сырларын көңіліне түйіп, талай рет батырдың тапқырлығы мен шешендігінің, елдік намысты алқалаған турашылдығының, өмірдің әр құбылысынан жаңа ой түйе білетіндігінің куәсі болды.

Соның нәтижесінде Мамытбек Қалдыбайдың көптомдығындағы Бауыржан Момышұлы баяндаған К.Рокосовский, Г.Жуков, А.Василевский, И.Баграмян, И.Панфилов, И.Чистяков, А.Фадеев, Л.Соболев А.Толстой, М.Әуезов, С.Мұқанов, Ғ.Мүсірепов, Ғ.Мұстафин, А.Жұбанов, Қ.Сәтбаев, А.Панкратова, Е.Бекмаханов тәрізді тұлғалар туралы әңгімелері тың деректерге бай, тартымды, рухани тәрбиелік мәні өте терең. Қаһарман өмірінен сыр шертетін 10 томдық жинақ «Бекасыл әулие» жеке қорының демеушілігімен Алматыдағы «Керулен Принт» баспаханасынан жарық көрді.

Ержан ИСАҚҰЛОВ,

генерал-майор, Жазушылар одағының мүшесі

Соңғы жаңалықтар

Заречный кентінің тұрғындары жаңа қонысқа көшті

Аймақтар • Бүгін, 14:25

2025 жылы қандай тұлғалармен қош айтыстық?

Тұлға • Бүгін, 14:00

Қасым-Жомарт Тоқаев Besqaru зауытымен танысты

Президент • Бүгін, 13:30

Рустам Баялиев қызметінен босатылды

Президент • Бүгін, 13:16

Биыл қанша жас дәрігер ауылдан жұмыс тапты?