Бектенов Каспийдегі трагедиядан кейін Қорғаныс министрлігінде анықталған мәселелер туралы айтты

Маңғыстау облысындағы трагедия әскери оқу-жаттығуларды жоспарлау мен өткізудегі жүйелі мәселелерді көрсетті. Бұл туралы премьер-министр Олжас Бектеновтің оқу-жаттығулар кезіндегі қауіпсіздік талаптарын күшейту туралы депутаттық сауалға берген жауабында айтылған, деп хабарлайды Tengrinews.kz.

Қорғаныс министрлігінің тексерісі нені көрсетті?

Бектеновтің айтуынша, Каспийдегі қайғылы оқиға әскери жаттығуларды ұйымдастыру кезіндегі жүйелі олқылықтарды ашып берді.

"Қорғаныс министрлігін кешенді тексеру нәтижесінде оқу-жаттығулар
барысын бақылауды ұйымдастыруда, ықтимал тәуекелдерді бағалауда және жағдай өзгерген кезде жедел ден қоюға дайындықта кемшіліктер бар екені анықталды. Атап айтқанда, қауіпті факторларға жеткілікті назар аудармау, қауіпсіздік талаптарының сақталуына және оқу-жаттығулардың қауіпті кезеңдерін тоқтата тұру туралы шешімдердің уақтылы қабылдануына тиісті бақылаудың болмауы", - делінген Бектеновтің жауабында.

Бұл ретте премьер-министр Қазақстан Қарулы күштерінде әуеден бақылау жүргізу үшін ұшқышсыз ұшу аппараттары қолданылып жатқанын атап өтті. Жекелеген күш құрылымдары бөлімшелерінде әскери қызметшілердің орналасқан жерін анықтауға және олардың физиологиялық жай-күйін бақылауға мүмкіндік беретін дербес құрылғылар пайдаланылады.

Бұдан бөлек, мемлекеттік күштік органдар Қазгидрометпен өзара іс-қимылды жолға қойды. Олар ауа райының болжамды өзгерістері мен дауылды ескертулер туралы ақпаратты тұрақты түрде алып отырады.

Бектенов Мемлекет басшысының тапсырмасы бойынша уәкілетті органдар Әскери реформа жоспарының жобасын әзірлегенін айтты. Онда әскери басқару жүйесін жетілдіру және оқу-жаттығуларды жоспарлауды стандарттау қарастырылған. Сонымен қатар Үкімет басшысының жауабынан әскери қызметшілердің қауіпсіздік талаптарын мүлтіксіз сақтау басты шарт болып қала беретіні белгілі болды.

24 қыркүйекте Маңғыстау облысындағы әскери-теңіз оқу-жаттығуы кезінде әскери қызметшілерді Каспий теңізіне ағызып әкеткен болатын. Олар жағалауда оқу-жауынгерлік тапсырмаларды орындап жатқанда ауа райы күрт бұзылып, жел күшейген. Теңізде 17 адам қалып қойды. Үш адам құтқарылып, 14-і қаза тапты.

Трагедиядан кейін Қасым-Жомарт Тоқаев Қорғаныс министрлігіне кешенді тексеріс жүргізуді тапсырды. Президент армияда жүйелі мәселелер бар екенін мәлімдеп, әскери қызметшілердің өлімін офицерлердің, соның ішінде генералдардың кәсібилік танытпауының салдары деп атады.

Кейінірек Қорғаныс министрлігінде кадрлық өзгерістер болды: Президент қорғаныс министрін ауыстырып, сондай-ақ қорғаныс министрінің жаңа орынбасарларын тағайындады.

21 қазанда Тоқаевтың төрағалығымен өткен Қауіпсіздік Кеңесінің отырысында Әскери реформа жоспары мақұлданды. 24 қазанда Қорғаныс министрлігі оны іске асыру басталғаны туралы хабарлады.

Бізді Google-дың негізгі дереккөздер тізіміне қосыңыз