Белсенділер біліктілігін арттырды

Qazaq24.com, Egemen.KZ дереккөзінен алынған мәліметтерге сүйене отырып мәлімдеме жасады..

Маңғыстаулық белсенділер «Көшбасшылар керуені» жобасы аясында Астанаға келді. Олар үш күн бойы елордадағы мемлекеттік органдардың жұмысымен танысты. Сондай-ақ «Study tour» негізінде өңірдің дамуына қатысты мәселелерді талқылап, тәжірибе алмасты.

Делегация құрамында 15 қатысушы бар. Олар біліктілігін арттыруды көздеген облыстың қоғамдық кеңес мүшелері мен үкіметтік емес ұйым өкілдері. Соның бірі – Маңғыстау облысы Мұнайлы аудандық қоғамдық кеңес мүшесі Райхан Мусаева.

– Бірінші күні депутаттар мен қоғамдық кеңес мүшелеріне сарапшы Гүлмира Қорғанбаева «Аймақтардың стратегиялық дамуы» тақырыбында тренинг өткізді. Жиында аймақтық стратегияны тиімді жоспарлаудағы негізгі тәсілдер талқыланды. Толғандырған сауалдарымызды қойып, ой-пікірмен бөлістік. Кейін Мәдениет және ақпарат министрлігі өкілдерімен жүздесіп, мемлекеттік саясаттың өзекті бағыттары, азаматтық қоғамды қолдау тетіктері мен қоғамдық кеңестердің қызметі жайында кең көлемде ақпарат алдық. Осы кездесулердің нәтижесінде даму жоспарын құру үшін командаға түрлі машық пен қабілеті бар төрт типтегі маманды тарту қажеттігін түсіндім, – деді Р.Мусаева.

Жоба Маңғыстау облысының Ақпарат және қоғамдық даму басқармасының тапсырысымен «Маңғыстау облысы Азаматтық альянсы» ЗТБ ұйымдастырған. Мақсат – өңірдің белсенділерін қолдау, азаматтық қоғам институтын нығайту және қоғам мен мемлекеттік органдар арасындағы жүйелі байланыс орнату.

Қатысушылар екінші күні Қазмедиа орталығына барып, 22 қабатты телеорталық ғимаратын аралады. Студиялардың жұмысын көріп, Орталық коммуникациялық қызметінің брифингтері өтетін алаңға барды. Одан кейін Сенат депутаттарымен жүздесті. Ертеңіне Мәжіліс депутаттарымен кездесіп, заң шығару үдерісі, қоғаммен кері байланыс орнату жөнінде әңгімелесті. Өңір белсенділері «Қазақстан халқына» қорының бағдарламалары, әлеуметтік жобаларды қолдау және өңірлік бастамаларымен танысты.

– Тур кезінде ұйымдастырылған іс-шаралар қатысушылардың кәсіби сауатын арттыруға, халықпен етене байланысын күшейтуге, азаматтық белсенділігін шыңдай түсуге бағытталған. Мұндағы 15 адам түрлі бағытта еңбек етеді. Араларында мұғалімдер, медицина қызметкерлері де бар. Бірақ бәрімізді біріктіретін ортақ ұстаным – елге қызмет ету, қоғамға пайдалы болу, оңтайлы әрі тиімді жұмыс жүйесін қалыптастыру, – деді Маңғыстау облысы Қоғамдық кеңесінің мүшесі Қайырғали Қалмұқанов.

Соңғы жаңалықтар