Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратады..
Батыс Қазақстан облысында 11-сыныптың екі оқушысы мектеп спорт залының киім ауыстыратын бөлмесі алдында төбелесіп қалған. Қыздар бір-бірін шашынан жұлып, соққыға жыққан. Жанжалды мұғалімдер тоқтатты, деп хабарлайды Tengri Education.
Мектеп оқушыларына қатысты Әкімшілік құқық бұзушылық туралы кодекстің 434-бабы 1-бөлігі (ұсақ бұзақылық, қоғамдық тәртіпті бұзу және айналасындағыларға құрметсіздік көрсетпеу) бойынша әкімшілік хаттамалар толтырылды.
"Жанжал кезінде мектеп оқушылары бір-бірінің шашынан тартып, соққы жасаған, осылайша қоғамдық тәртіп пен азаматтардың тыныштығын бұзған. Аталған әрекеттері үшін олар әкімшілік жауапкершілікке тартылды", - деп хабарлады БҚО соты.
Сотта қыздар болған жағдайды ішінара мойындап, жанжалды басқа сыныптың оқушылары бастағанын айтты. Олардың заңды өкілдері оқиға туралы қыздарынан және мұғалімдерден естігендерін жеткізді.
Сот іс материалдарын, қатысушылар мен куәгерлердің айғақтарын, сондай-ақ полиция қызметкерлерінің рапорттарын зерделеп, оқушыларды әкімшілік құқық бұзушылық жасағаны үшін кінәлі деп таныды.
Қыздар кәмелетке толмағандықтан, әкімшілік айыппұл олардың заңды өкілдеріне салынды. Жалпы соммасы 43 250 теңге болды.
Сот қаулысы заңды күшіне енген жоқ, деп хабарлады Батыс Қазақстан облыстық сотының баспасөз қызметі.
Бізді Google-дың негізгі дереккөздер тізіміне қосыңыз
Қосу