Бірлік пен келісім жолындағы миссия

Egemen.KZ парақшасынан алынған деректерге сүйене отырып, Qazaq24.com мәлімдеме жасады..

Қазақ жеріне табан тіреген талай этнос ризашылығын білдіретін Алғыс айту күні ел бірлігінің рәмізіне айналған Қазақстан халқы Ассамблеясы құрылған тарихи датамен тікелей байланысты. Үш онжылдықты еңсерген ұйым бүгінде қоғамдық келісімнің темірқазығына айналып, сан алуан мәдениетті ортақ мүдде аясына ұйыстырды. Уақыт сынынан өткен іргелі институт құрылымы елдегі саяси жаңғыру кезеңінде қалай өзгереді?

Сурет: Қазақстан халқы Ассамблеясы

Бағдарласақ, ҚХА сонау 1995 жылы алғаш құрылған сәтінен бері өзіндік бас-аяғы бар трансформациядан өткен. Бастапқы кезеңде ұйым этносаралық келісім мен мәдени өзара түсіністікті нығайтуға бағытталған қарапайым құрылым ретінде бекіді. Яғни тәуелсіздіктің алғашқы жылдарында әр этнос өз тарихын, тілін, мәдениетін дамытуға мүмкіндік алды. Өз тарихын зерделеу арқылы олар қазақ халқының қиын кезеңдердегі қолдауын терең түсінді. Бұл ортақ тағдыр мен ризашылық сезімін қалыптастырды. Елге жер аударылған қай этностың өкілі болсын мұны әрдайым алғыспен еске алады.

Уақыт өте Ассамблеяның миссиясы кеңейіп, ол ұлттық бірлік пен тұрақтылықты қамтамасыз ететін маңызды құрылымға айналды. Жыл сайынғы сессияларында ел дамуына қатысты өзекті мәселелер талқыланып, маңызды шешімдер қабылданатын болды. Сондай-ақ ұйым қазақтың дәстүрін жаңғыртуға, төл құндылықтарымызды дәріптеуге, қоғамдық келісімді нығайтуға бағытталған жобаларды табысты жүзеге асырды.

«Ассамблеяның басты міндеттерінің бірі жастар санасына бірлік құндылықтарын сіңіру болды. «Мың бала» жобасы мен қазақ тілін оқытудың деңгейлік бағдарламалары секілді түрлі бастамалар мемлекеттік тілге қызығушылықты арттырды. Нәтижесінде, мемлекеттік тілдің этносаралық қатынастағы рөлі күшейді. Есесіне, қоғамдық салаларда қазақ тіліне судай жаңа буын қалыптасты», деді ҚХА Аналар кеңесінің төрағасы Нәзипа Шанаи.

Ассамблеяның конституциялық мәртебе алуы оның рөлін күшейтті. Халықаралық аренада Ассамблея этностардың құқығын қорғау мен мәдени әртүрлілікті сақтаудың тиімді үлгісі ретінде мойындалды. Осылайша, еліміз өзіндік келісім моделін қалыптастырды.

«Қазақ халқы – мемлекет құраушы ұлт ретінде елдегі барлық этносты өз айналасына топтастыра алды. Ал Ассамблея этносаралық диалог пен мәдени ынтымақтастықтың негізгі алаңына айналды. Бүгінде тарихи миссиясын орындады деп айтуға негіз бар. Тәуелсіздік жылдарынан бері егемен елде жаңа буын қалыптасты. Енді сол ұрпақ балаларына ел тарихын, бірлік пен татулықтың құндылығын әрі қарай да жеткізе алады, – деді Н.Шанаи.

Ендеше, ендігі миссия жаңа мазмұнда жалғасады. Қызылордада өткен Ұлттық құрылтайдың түйінді отырысында Президент Қасым-Жомарт Тоқаев жалпыұлттық диалогті жүйелі жүргізуге арналған жаңа институт құру бастамасын көтерді. Мемлекет басшысы Ассамблея мен Ұлттық құрылтайдың тарихи маңызы бар миссиялары іс жүзінде табысты аяқталғанын атап өтіп, жаңа институт ретінде Қазақстанның Халық кеңесін құруды ұсынды. Болашаққа көз салсақ, Халық кеңесі қоғамдық келісім мен ұлттық бірлікті сақтау міндетін заманауи саяси форматта жалғастыра отырып, елдің дамуы мен реформалық бағыттарына ықпал етеді.

«Кеңес ел ішіндегі бірлік пен сенімді нығайтып қана қоймай, әлеуметтік әділет, тілдік және мәдени әртүрлілікті сақтау, азаматтардың ұсыныстарын мемлекеттік саясатқа жүйелі енгізу бағытында стратегиялық үйлестіруші органға айналады. Оның тиімділігі – инклюзивтілігінде. Өңірлік өкілдік – елдегі әрбір аймақтың ерекшелігін, әлеуметтік-мәдени жағдайын ескеруге мүмкіндік береді. Ал қызметі мемлекеттік бағдарламаларға қоғамдық мониторинг жүргізу, тәуекелдерді болжау, мәдени-гуманитарлық саясатты үйлестіру, қоғамдық бастамаларды қолдау бағытында дамиды. Бұл мемлекеттік басқару жүйесіне сапалық тұрғыдан үш маңызды өзгеріс әкеледі: шешім қабылдау үдерісінің ашықтығы мен есептілігі артады, қоғам мен билік арасындағы сенім нығаяды, елде тұрақтылық пен бірлік жаңа институционалдық негізге көшеді», деді Республикалық медиация кеңесінің төрағасы, Ұлттық құрылтайдың, Қазақстан халқы Ассамблеясы кеңесінің мүшесі Шерзод Пулатов.

Осылайша, келісім тәжірибесі, бірлік идеясы институционалдық эволюция кезеңіне қадам басты. Ендігі Қазақстанның Халық кеңесі «Халық үніне құлақ асатын мемлекет» тұжырымдамасын нақты іске асыратын қадам болады деп күтіледі.

Соңғы жаңалықтар

«Тегеран енді бұрынғыдай болмайды»: Израиль мен АҚШ Иранға соққы жасады

Оқиға • Бүгін, 12:57

Алматылықтар Михаил Шайдоровты салтанатты түрде қарсы алды

Оқиға • Бүгін, 11:27

Ақша айырбастау орындарында доллар бағамы қандай?

Қаржы • Бүгін, 10:45

Елімізде қай жолдар жабық тұр?

Ауа райы • Бүгін, 10:20

Ілтипат пен ізет үлгісі

Қоғам • Бүгін, 09:55

Дананың сөзі ұраныма айналды