Inform.KZ парақшасынан алынған ақпаратқа сүйене отырып, Qazaq24.com хабарлама жасады..
Павлодар облысынан биылғы көктемде еліміздің әскери құрылымдарына 704 адамды шақыру жоспарланған. Бұл туралы өңірлік Қорғаныс істері жөніндегі департамент бастығының орынбасары Қуат Жақанов мәлімдеді.
Жігіттердің басым бөлігі Қарулы Күштер (380 адам) мен Ұлттық ұланға (240 адам) жіберіледі. Тағы 50 сарбаз Ұлттық қауіпсіздік комитетінің Шекара қызметінде, 25-і Төтенше жағдайлар министрлігінде, 9-ы Мемлекеттік күзет қызметінде борышын өтейді.
- Әскерге шақырылушыларды бұрынғыдай көшеден алып кетудің тәжірибесі енді қолданылмайды. Әскерден жалтарушыларды іздестіруді тек ішкі істер органдары жүзеге асырады. Мерзімді қызметтегі әскери қызметшілер үшін 2022 жылдан бастап енгізілген жеңілдіктер қолданыста. Олар қызметін өткергеннен кейін екі жыл ішінде жергілікті оқу орындарына Ұлттық бірыңғай тестілеу нәтижелеріне қарамастан әңгімелесу қорытындысы бойынша түсе алады, - деп атап өтті департамент өкілі.
Еске сала кетейік, Астанадан көктемде 1400 ұлан әскерге шақырылады.