Tengrinews.KZ парақшасындағы деректерге сәйкес, Qazaq24.com ақпарат таратты..
Желіде Балқаш пен Приозерск арасындағы тасжолда болған оқиға туралы ақпарат тарады. Kia жүргізушісі жол бойында қатар келе жатқан көліктен шөлмек лақтырылып, соның салдарынан көлігінің алдыңғы әйнегі зақымдалғанын мәлімдеді. Полиция күдікті көліктің жүргізушісін анықтады, деп хабарлайды Tengri Auto.
Әлеуметтік желілерде тараған мәлімет бойынша, оқиға 16 қазан күні сағат 16:30 шамасында болған. Куәгерлердің айтуынша, ішінде белгісіз заты бар пластик шөлмек сол бағытта қозғалып бара жатқан ақ түсті Lada Priora көлігінен лақтырылған көрінеді.
Жазба авторының сөзінше, шөлмек капотқа тиіп, алдыңғы әйнекті тесіп өткен және салон ішімен ұшып барып, Kia-ның артқы әйнегінен шығып кеткен.
Әйнектің ұсақ сынықтары көлікте отырған адамның көзіне түскен.
Instagram-дағы бұл жарияланымды көру
Сондай-ақ жазбада оқиға орнына полиция шақырылғаны, бірақ Lada Priora жүргізушісін бірден анықтау мүмкін болмағаны айтылған. Автор ықтимал куәгерлерден бейнетіркегіш жазбаларын бөлісуді сұрады.
Tengrinews.kz редакциясы жауап алу үшін Қарағанды облысы полиция департаментіне хабарласты. Ондағылар 16 қазан күні полицияға 24 жастағы ер адамның жүгінгенін растады. Ол Астана – Алматы тасжолының Балқаш пен Приозерск аралығындағы бөлігінде келе жатқанда Kia автокөлігінің алдыңғы әйнегі зақымдалғанын хабарлаған.
"Өтініш берушінің айтуынша, қозғалыс кезінде сол бағытта бара жатқан Lada Priora автокөлігінің терезесінен шөлмек лақтырылған. Ол оның көлігінің алдыңғы әйнегіне тиіп, оны зақымдаған", – деп хабарлады полиция.
Жүргізілген іс-шаралар барысында құқық қорғау органдары аталған көліктің жүргізушісін анықтады. Ол Балқаш қаласының 34 жастағы тұрғыны болып шықты.
Полициядағылар ер адамның болған жайтқа қатысты өз нұсқасын ұсынғанын атап өтті. Оның айтуынша, зат көліктің дөңгелегі астынан ұшып кетуі мүмкін. Сонымен қатар жүргізуші көлік терезесінен қандай да бір зат лақтырғанын жоққа шығарды.
"Болған дерек бойынша әкімшілік іс қозғалды. Автокөлік айыппұл тұрағына қойылды. Жиналған материалдар шешім қабылдау үшін сотқа жолданды", - деп толықтырды Қарағанды облысы ПД баспасөз қызметі.
Көлікті сызып, қашып кетті: не істеу керек және камера жазбалары қанша уақыт сақталады?
Бізді Google-дың негізгі дереккөздер тізіміне қосыңыз
Қосу