Arasha.KZ парақшасынан алынған ақпаратқа сәйкес, Qazaq24.com хабарлайды..
Кеше сот Алматы облысындағы Қызылқайрат ауылындағы кісі өлтіру және адам ұрлау ісі бойынша үкім шығарды. Зорлық-зомбылық пен бопсалаудың құрбаны болған келіншектің шағымына қарамастан, бостандықта жүрген ер адам ақыры қанды қылмысқа барды: ол әйелдің ағасын атып өлтіріп, үйіне қарумен басып кіріп, кішкентай баланы алып қашқан, деп хабарлайды Arasha.kz.
Естеріңізге сала кетейік, оқиға қалай болған еді? Жас келіншек полицияға жүгініп, бұрынғы жігіті алдымен оған көліктерді өз атына рәсімдетпек болғанын, ал ол бас тартқанда зорлап, бәрін видеоға түсіріп, бопсалай бастағанын айтқан. Ол әйелге тыныштық бермеген. Шыдамы таусылған бойжеткен бірде өз-өзіне қол жұмсамақ та болған. Отбасы да қарап отырмай, туыстары ер адамды өздері тауып, полицияға апарып, арыз жазған. Тергеу амалдары жүруі тиіс еді, бірақ оны босатып жіберген. Бірнеше күннен кейін ол қайта оралды.
Қаруланған, қолында шолақ мылтығы мен пышағы бар ол кек алуға аттанған. Алдымен көшеде әйелдің ағасын жолықтырып, оның тура жүрегінен атқан. Қаза тапқан азаматтың артында үш кішкентай баласы мен жүкті әйелі қалды. Осыдан кейін шабуылдаушы үйге басып кірген. Іште әйелдер мен балалар болған. Ол көзіне түскеннің бәрін қорқытқан. Әлгі әйелдің өзін таба алмаған соң, тіпті сорақы іске барған – үйден екі жасар баланы тартып алып, қашып кеткен. Ол қызды кепілде ұстап, анасынан өз-өзіне қол жұмсауды талап еткен.
Артынан қуғын басталды. Оны полицейлер мен арнайы жасақ іздеді. Тауда қуғыннан қашпақ болғанда, көлігі жолдан шығып кетіп, аударылған. Бала жарақат алса да, аман қалды. Кейінірек қыз балаға ота жасалып, өмірі сақталды.
Оқиғадан кейін шабуылдаушының бұған дейін де алаяқтық жасағаны үшін құқық қорғау органдарының назарына іліккені белгілі болды. Енді оған зорлау, бопсалау, жеке материалдарды тарату, кісі өлтіру, баланы ұрлау, қорқыту, үйге заңсыз басып кіру сияқты ауыр айыптар тағылды. Сондай-ақ, сот оның бұл қылмысқа жасөспірімдерді де тартқанын анықтады. Нәтижесінде ер адам 25 жылға бас бостандығынан айырылды. Ал екі кәмелетке толмаған жасөспірімнің әрқайсысы 9 жылдан колонияға кесілді.