Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратты..
Қазақстанда 2026 жылдың тоғыз айында өткен жылдың сәйкес кезеңімен салыстырғанда қылмыс саны 15 пайызға азайды. Бұл туралы ведомство жұмысының қорытындысы шығарылған ІІМ алқа отырысында белгілі болды, деп хабарлайды Tengrinews.kz Polisia.kz сайтына сілтеме жасап.
ІІМ мәліметінше, қылмыс саны 11 мыңнан астам дерекке азайған. Ведомство құқық бұзушылықтардың алдын алу мен олардың дер кезінде жолын кесуге ерекше көңіл бөлініп жатқанын атап өтті.
321 мың заңбұзушылық және 1 318 қоқыс үйіндісіТоғыз ай ішінде полиция қоғамдық орындарды ластау және абаттандыру ережелерін сақтамауға қатысты 321 мыңнан астам заңбұзушылықтың жолын кесті.
Полицияның ден қою шараларының нәтижесінде 1 318 стихиялық қоқыс үйіндісі жойылды.
Вандализм мен заңсыз жазуларға да ерекше назар аударылды. Жыл басынан бері 12 мыңнан астам граффити өшіріліп, мұндай деректер бойынша 5,8 мыңға жуық әкімшілік іс қозғалды.
Еріктілермен бірлесіп 13 мыңға жуық профилактикалық іс-шара өткізілді.
90 мың жанжал шығарушы және 25 мың қамауға алу: тұрмыстық зорлық-зомбылық статистикасы не дейді?Отбасылық-тұрмыстық зорлық-зомбылық саласында зардап шеккендерді қорғау және қайталанатын жағдайлардың алдын алу шаралары күшейтілді.
Тоғыз айда 90 мыңнан астам отбасылық жанжал шығарушы әкімшілік жауапкершілікке тартылды - бұл өткен жылмен салыстырғанда 18,4 пайызға көп. Оның ішінде 25 мың адам әкімшілік қамауға алынды.
Полиция 73 мыңнан астам қорғау нұсқамасын шығарды. Оларды бұзғаны және сот белгілеген шектеулерді сақтамағаны үшін 20,5 мың адам жауапқа тартылды.
Қауіпсіздікті қамтамасыз ету мақсатында дағдарыс орталықтарына балаларымен бірге 4,5 мың әйел орналастырылды.
Сонымен қатар отбасылық-тұрмыстық зорлық-зомбылық деректері бойынша шағымдар саны 1,2 мыңға азайды. Бұл саладағы қылмыстық құқық бұзушылықтар саны 10,4 пайызға, кісі өлімі 11 пайызға төмендеді.
11,9 миллион заң бұзушылық және 386 дрифт: жолдардағы жағдай қандай?Полиция түнгі жарыстардың, қауіпті дрифт пен шуға байланысты қоғамдық тәртіпті бұзу деректерінің жолын кесуді жалғастырып жатыр. Жыл басынан бері жол қозғалысы ережелері мен қоғамдық тәртіпті бұзған 386 дрифт дерегі тіркелді. 59 құқық бұзушы қамауға алынып, 142 автокөлік айыппұл тұрағына қойылды.
Жолдарда барлығы 11,9 миллион ЖҚЕ бұзу дерегі анықталды. Оның ішінде - көлікті мас күйінде басқарудың 19 мыңнан астам және рөлде отырып телефон пайдаланудың 247 мыңнан астам дерегі бар.
2,4 мың жүргізуші көлік басқару құқығынан айырылды.
Бұл ретте ЖКО саны 5 пайызға, жарақат алғандар саны 7 пайызға, қаза тапқандар саны 16 пайызға азайды.
Стрим үшін қамауға алу: тікелей эфирлер немен аяқталды?Полиция тікелей эфир кезіндегі балағат сөздер мен заңсыз мінез-құлықтарға қатысты шаралар қабылдауды жалғастырып жатыр.
150-ден астам пайдаланушы, соның ішінде блогерлер мен стримерлер әкімшілік жауапкершілікке тартылды. Оның ішінде 58 адам әкімшілік қамауға алынды.
Бизнес кейпіндегі криминал: ІІМ жаңа схемаларды әшкереледіЖыл басынан бері ұйымдасқан қылмысқа қарсы күрес бағыты бойынша 44 қылмыстық іс тіркелді, оның үшеуі трансұлттық сипатта.
Криминалдық ортаның 238 өкілі қылмыстық жауапкершілікке тартылып жатыр.
ІІМ қылмыстық топтардың, соның ішінде бизнес атын жамылып, алаяқтық схемалар мен қаржы пирамидаларын құру арқылы әрекет ететінін атап өтті.
Заңсыз айналымға 31 тоннадан астам есірткі жіберілмедіТоғыз айда өткен жылдың сәйкес кезеңімен салыстырғанда есірткі зертханаларының жолын кесу көрсеткіші 9-ға артты. Заңсыз айналымға 31 тоннадан астам есірткі жіберілмеді - бұл өткен жылмен салыстырғанда 20 пайызға көп.
ІІМ қызметкерлердің тәртібін бақылауды күшейттіОтырыста ішкі істер министрі Ержан Сәденов ІІМ Ұлттық ұлан қолбасшылығына әскери тәртіпті нығайтуды және қызмет өткеру қауіпсіздігін қамтамасыз етуді тапсырды. Әскери қызметшілердің өмірі мен денсаулығын сақтау басымдық ретінде белгіленді. Министр дайындық пен жаттығуларды заманауи талаптарды ескере отырып қайта қарауды, оның сапасына баса назар аударуды талап етті.
Полиция қатарында заңдылықты сақтау бойынша да жеке міндеттер қойылды. Жеке құрамның тәртібіне, қызметтік этикасына және қызметкерлердің, соның ішінде әлеуметтік желілердегі мінез-құлқына бақылауды күшейту тапсырылды.
Сондай-ақ киберқылмыс пен экстремизмге қарсы іс-қимыл, құқықбұзушылықтың алдын алу, көші-қонды бақылау, тергеу жұмысы және қылмыстық-атқару жүйесінің қызметі бойынша міндеттер жүктелді.
Еске сала кетейік, бұған дейін Мемлекет басшысы Қасым-Жомарт Тоқаев ішкі істер министрі Ержан Сәденовті қабылдады. Президентке елдегі криминогендік жағдай және қоғамдық қауіпсіздік пен құқықтық тәртіпті қамтамасыз ету жөніндегі тапсырмаларының орындалу барысы баяндалды.
Бізді Google-дың негізгі дереккөздер тізіміне қосыңыз
Қосу