ЕАЭО да еттің кей түрлерін импорттауға арналған квоталар бекітілді

АСТАНА, 27 тамыз – Sputnik. ЕЭК алқасы 2027 жылы Еуразиялық одаққа еттің кей түрлері мен сүт сарысуын импорттауға арналған тарифтік квоталарды бекітті, деп хабарлады комиссия.

"Еуразиялық экономикалық одақ туралы шартқа сәйкес, ЕЭК ұйымға мүше мемлекеттердегі тұтыну және өндіріс теңгерімін, сондай-ақ елдердің Дүниежүзілік сауда ұйымы алдындағы міндеттемелерін ескере отырып, үшінші елдерден шығатын және ЕАЭО-ның кедендік аумағына әкелінетін ауыл шаруашылығы тауарларының кейбір санаттарына қатысты тарифтік квоталарды белгілейді", – деп еске салды ЕЭК-тің сауда блогы.

Қазақстан мен Ресей үшін 2027 жылға арналған тарифтік квоталар мемлекеттердің ДСҰ-ға қосылуы туралы хаттамаларда бекітілген көлемде айқындалды.

Армения, Беларусь және Қырғызстан үшін тарифтік квоталар тараптардың өтініштерін ескере отырып, тұтыну мен өндіріс арасындағы айырмадан аспайтын көлемде бекітілді.

Ірі қара мал еті бойынша квоталар:

Армения үшін – 8 мың тонна;

Қазақстан үшін – 21 мың тонна;

Қырғызстан үшін – 5 мың тонна;

Ресей үшін – 570 мың тонна.

Шошқа еті бойынша квоталар мынадай көлемде бөлінеді:

Армения үшін – 14 мың тонна;

Беларусь үшін – 20 мың тонна;

Қырғызстан үшін – 2 мың тонна.

Құс еті мен оның субөнімдері бойынша тарифтік квоталар:

Армения үшін – 45 мың тонна;

Беларусь үшін – 10,9 мың тонна;

Қазақстан үшін – 140 мың тонна;

Қырғызстан үшін – 58 мың тонна;

Ресей үшін – 364 мың тонна.

Сүт сарысуын импорттауға арналған тарифтік квота Ресей үшін 15 мың тонна көлемінде бекітілді.