Qazaq24.com, Sputnik.KZ дереккөзінен алынған мәліметтерге сүйене отырып жаңалық жариялады..
АСТАНА, 7 қазан – Sputnik. Бүгін Еуразиялық экономикалық одақ (ЕАЭО), оған мүше мемлекеттер және Біріккен Араб Әмірліктері (БАӘ) арасындағы 2025 жылғы маусымда қол қойылған экономикалық серіктестік туралы келісім күшіне енді. Бұл туралы Еуразиялық экономикалық комиссия хабарлады.
Еуразиялық экономикалық комиссияның мәліметінше, келісім сауда режимін айтарлықтай ырықтандыруды көздейді.
БАӘ ЕАЭО елдерінен импортталатын тауарлардың 86%-ына жеңілдетілген сауда шарттарын ұсынды. Бұл Одақ экспортының 98%-ына сәйкес келеді.
"Серіктес елдің одақ тауарларына қолданатын орташа мөлшерлемесі 5%-дан 0,6%-ға дейін төмендейді. Біздің бағалауымыз бойынша алынған жеңілдіктер ЕАЭО елдерінің экспорттаушыларына кедендік баждарды төлеу кезінде жыл сайын 266 млн долларға дейін үнемдеуге мүмкіндік береді", – деді сауда жөніндегі министр Андрей Слепнев.
Оның айтуынша, орта мерзімді перспективада тауар айналымының өсімі кемінде 5-6 млрд долларды құрайды.
Келісім сондай-ақ шағын және орта бизнесті қоса алғанда, іскерлік орта арасындағы өзара іс-қимылды дамытуға бағытталған заманауи ережелер мен тетіктерді бекітеді.
"Көлік және логистика саласындағы ынтымақтастық та қарастырылған. Оның аясында БАӘ-ні халықаралық "Солтүстік – Оңтүстік" дәлізіне қосу мүмкіндігі бар", – делінген комиссия хабарламасында.
Андрей Слепнев ЕАЭО елдерінің бизнес өкілдерін жаңа мүмкіндіктерді белсенді пайдалануға және Әмірлік тарапымен ынтымақтастықты дамытуға шақырды.
"Солтүстік – Оңтүстік" – ұзындығы 7,2 мың шақырым болатын халықаралық көлік дәлізі. Ол Еуразия елдерін Парсы шығанағы және Үндістанмен Каспий өңірі мен Иран арқылы теміржол, автомобиль және теңіз жолдары желісімен байланыстырады.