Qazaq24.com, Sputnik.KZ дереккөзінен алынған ақпаратқа сүйене отырып жаңалық таратады..
АСТАНА, 2 қыркүйек – Sputnik. Еуразиялық экономикалық одақтың жаңа сауда келісімдері 300 мыңнан астам қосымша жұмыс орнын ашуға мүмкіндік береді. Бұл туралы Еуразиялық экономикалық комиссияның сауда министрі Андрей Слепнев мәлімдеді.
"Егер 2019 жылы Еуразиялық экономикалық одақ елдерінің сыртқы саудасындағы Батыс елдерінің үлесі 60 пайыз болса, қазір бұл көрсеткіш 20 пайыздан төмен. Керісінше, Жаһандық Оңтүстік елдерінің үлесі 40 пайыздан 80 пайызға дейін өсті. Бұл ретте сыртқы сауда көлемі іс жүзінде төмендеген жоқ. Біз бұрынғы нарықтарды жедел түрде кеңейтіп, жаңа нарықтар тауып, жаңа байланыстар орната алдық", – деді министр.
Андрей Слепнев одақ аясындағы Вьетнаммен жасалған алғашқы еркін сауда келісімін мысалға келтірді. Оның айтуынша, осы келісімнің арқасында ет өнімдері, минералды тыңайтқыштар, химия өнеркәсібі өнімдері мен металлургия тауарларының экспорты бірнеше есе артқан.
ЕЭК министрі атап өткендей, мұндай өсімнің нәтижесінде көптеген жаңа жұмыс орындары ашылады.
Ол күшіне енетін Моңғолия, Біріккен Араб Әмірліктері және Индонезиямен жасалған келісімдердің де келешегі зор екенін айтты. Бұл елдерге тауар жеткізу көлемі шамамен 12 млрд долларға артады деп жоспарланып отыр. Нәтижесінде ЕАЭО экономикасында шамамен 160 мың қосымша жұмыс орны ашылады.
Андрей Слепнев Үндістан бағытын да болашағы зор деп атады.
"Біз тауар жеткізу көлемі шамамен 10 млрд долларға артады деп күтіп отырмыз. Бұл тағы да шамамен 180 мың жоғары өнімді жаңа жұмыс орнын ашуға мүмкіндік береді", – деп атап өтті ол.
Сонымен қатар, министрдің пікірінше, көптеген сауда келісімі өңірлер экономикасын нығайтуға үлкен серпін береді.