Екібастұзда цифрлық хаб құрылады: Жер учаскелері анықталып, келісімдер жасалды

Egemen.KZ парақшасындағы деректерге сәйкес, Qazaq24.com ақпарат таратты..

Елімізде ірі цифрлық инфрақұрылым қалыптастыруға бағытталған «Деректерді өңдеу орталықтары алқабы» жобасын іске асыру қарқын алды. Жоба аясында инвесторлар тарту, энергетикалық база құру және арнайы жеңілдіктер енгізу жұмыстары жүргізіліп жатыр, деп хабарлайды Egemen.kz.

Фото: Үкімет, телеграм

Премьер-министр Олжас Бектенов Мемлекет басшысының Ұлттық құрылтайдың V отырысында берген тапсырмаларын орындау шеңберінде «Деректерді өңдеу орталықтарының алқабы» жобасының жүзеге асырылу барысы бойынша кеңес өткізді.

Жиында Премьер-министрдің орынбасары – Жасанды интеллект және цифрлық даму министрі Жаслан Мәдиев, Энергетика министрі Ерлан Ақкенженов, Павлодар облысының әкімі Асайын Байханов, «Қазақтелеком» АҚ басқарма төрағасы Бағдат Мусин атқарылып жатқан жұмыстар туралы баяндады.

Үкіметтің баспасөз қызметінің мәлімдеуінше, Павлодар облысының Екібастұз қаласында жобаны іске асыру аясында жер учаскелері анықталып, негізгі келісімдер жасалды. Сонымен қатар қуаты 215 МВт болатын қосалқы станса сатып алынды, бұл жобаның энергетикалық инфрақұрылымының негізін қалыптастырады.

Кеңес барысында инвесторлар үшін қолайлы орта қалыптастыру мақсатында энергиямен жабдықтаудың жеңілдетілген тарифтік моделі бекітіліп, тиісті инвестициялық және салықтық преференциялар белгіленді.

Екібастұз ГРЭС-3 станциясы салынады: Елдің электр энергия өндірісі ұлғаяды

Бағдат Мусиннің айтуынша, жобаға халықаралық технологиялық және инвестициялық компанияларды тарту бойынша жұмыстар жалғасып жатыр. Атап айтқанда, АҚШ, Қытай және Үндістан елдерінен 20-дан астам hyperscale-компаниямен келіссөздер жүргізілген. Бұл компаниялар «бұлтты» есептеу, үлкен деректерді өңдеу және жасанды интеллект салаларында жұмыс істейді.

Келіссөздер нәтижесінде 100 МВт-тан жоғары қуатқа алдын ала сұраныс қалыптасты. Ал жобаның жалпы әлеуеті 1 ГВт-қа дейін жетіп, ірі «зәкірлік» клиенттерді орналастыруға мүмкіндік береді.

Жалпы алғанда, «Деректерді өңдеу орталықтары алқабы» жобасы Қазақстанда ірі өңірлік цифрлық хаб қалыптастыруға және әлемдік жетекші технологиялық компанияларды тартуға бағытталған.

Премьер-министр қажетті нормативтік шешімдерді жедел қабылдауды және жобаның барлық кезеңдерінің белгіленген мерзімде орындалуын қамтамасыз етуді тапсырды.