Qazaq24.com, 24.KZ дереккөзінен алынған мәліметтерге сүйене отырып ақпарат жариялайды..
Дәрігерлерге шабуыл жасап, денсаулығына қауіп төндіргендер 12 жылға дейін бас бостандығынан айырылуы мүмкін.
Жақында Президент тапсырмасымен арнайы заң қабылданып, Қылмыстық кодекске бірқатар өзгеріс енгізілді. Сондай-ақ, ақ халаттылардың қауіпсіздігі үшін жауапты министрлік бірқатар шараларды қолға алды. Жедел жәрдем қызметкерлеріне бейнежетон тағып, науқастарды қабылдау кабинеттеріне дабыл батырмасын орнатып жатыр.
Дәрігердің өміріне қауіп төндіргендерге жаза қатаң
Айнұр Қуатқызы, тілші:
- Ақ халаттылардың өміріне қауіп төндіргендерге жаза қатаң. Шабуылдаған адамның әрекеті қылмыс саналып, түрмеге тоғытылуы мүмкін. Денсаулық сақтау министрлігінің мәліметіне сүйенсек, соңғы бес жылда елімізде дәрігерлерге қатысты 280 зорлық-зомбылық дерегі тіркелген. Қызмет бабында соққыға жығылып, ауыр жарақат алғандардың бірі Қостанай облыстық ауруханасының дәрігері Антон Кистанов. Ол жарты жыл бойы ем қабылдағанын айтады.
Антон Кистанов, уролог:
- Сондай жағдай менің басымнан өтті. Алған жарақаттан емделгеннен кейінде, жұмысқа шыққанда бойымдағы үрейден біраз уақыт арыла алмадым. Қазір өзімді еркін, қауіпсіз сезінемін.
Айнұр Қуатқызы, тілші:
- Жаңа заңда қорқыту мен нақты күш қолдану екі бөлек қаралады. Медицина қызметкеріне қоқан-лоқы жасағандарға ауыр жаза жоқ, бірақ айыппұл салу, түзеу жұмыстарына тарту, 300 сағатқа дейін қоғамдық жұмыс немесе екі жылға дейін бас бостандығын шектеу көзделген. Ал ақ халаттыны соққыға жыққандарға жаза әлдеқайда қатаң.
Асхат Аймағамбетов Қр Парламенті Мәжілісінің депутаты:
- Біз осы қаңтар айының басында өңірлерге шығып, дәрігерлермен кездестік. Тіпті осы жедел-жәрдемнің жұмыскерлерімен, олардың жүргізушілерімен, фельдшерлармен кездескенде олар өте жақсы қабылдап, негізі осы маңыздылығын айтып отыр. Сондықтан әрине дәрігерлерді қорғау, оларды қорғау біздің барлығымыздың парызымыз. Бұл заң осы тұрғыда маңызды тетігі болады деп ойлаймын. Ал дәрігерді қорғау дегеніміз – ол дәрігердің өзін физикалық тұрғыда қорғау емес, ол сізді мысалы біздің қоғамымыздағы кішкентай нәресте балаларды, үлкен кісілерді қорғау. Өйткені 1 дәрігер осындай зорлық-зомбылыққа душар болса, онда қаншама жүздеген мыңдаған адамдарға қызмет көрсете алмайды. Сондықтан ол дәрігерді емес, жалпы қоғамды біздің науқастарды қорғайтын заң.
Айнұр Қуатқызы, тілші:
- Сонымен қатар бүгінде еліміздегі жедел жәрдем қызметкерлері бейнежетон тағып жүр. Денсаулық сақтау министрлігі ақ халаттылардың қауіпсіздігі үшін медицина қызметкерлерін видеожетон тағып жүруге міндеттеді. Бұдан бөлек бейне камералар, GPS және дабыл түймесі бар құрылғы пайдалануға берілген. Болашақта жетонды емханадағы дәрігерлер мен медбикелер де пайдаланбақ. Айта кетейік, өзіне қауіп төнген жағдайда дәрігер дереу полицияға SOS дабылын жібере алады. Ондағы жазбалар автоматты түрде дерекқорға жүктеледі. Сонымен қатар 152 стационарға тұрақты полиция бекеттері орналастырылған.
Ұлмира Нұралиева, ҚР ДСМ Ғылым және адами ресурстар департаменті директорының орынбасары:
- Бүкіл ресбулика бойынша 2100-ден астам жедел-жәрдем бригадасына 3600 бейне-жетондарды жабдықтау жоспарланып отыр. Және сонымен бірге медицина ұйымдарында жасанды интеллектіні пайдаланып, бейне бақылау жүйелерін енгізу жоспарланып отыр. 636 қабылдау бөлмелеріне дабыл түймелерін орналастыру қарастырылуда. Осындай жұмыстар жүргізілуде. ))
Айнұр Қуатқызы, тілші:
- Сонымен қатар дәрігерлер де қылмыстық жауапкершіліктен босатылмайды. Емдеу кезінде қателік жіберсе Қылмыстық кодекстің 317-бабы, ал медициналық көмек көрсетпесе – 320-бабы бойынша жауап береді. Бұл талап бұрыннан бар. Тағы айта кетерлігі, осы денсаулық сақтау саласын қаржыландыру соңғы жылдары үш есеге өсіп, былтыр 3 трлн теңгеге жеткен. Бұл медициналық көмектің көлемін кеңейтіп, инфрақұрылымды ауқымды түрде жаңғыртуға мүмкіндік берді. Сонымен қатар дәрігерлердің кәсіби жауапкершілігін сақтандыру тетігі іске қосылды. Әлеуметтік қолдау шараларының арқасында дәрігерлердің тапшылығы 19, ауылдық жерлерде 16 пайыз төмендеген.
Авторлары: Айнұр Қуатқызы, Шырын Батырбекқызы, Ырыстанбек Оспанов