Елордадағы спорт фестивалінде 6 жастан 93 жасқа дейінгі қатысушылар жарысты

Астаналықтар таң атпай Триатлон паркінде жиналды. Бұған себеп бұқаралық жүгіру және балалар мен жасөспірімдер арасындағы спорт сайыстары болды. 5 шақырым жүгіріске екі мыңнан астам адам тіркелген.

Сонымен бірге, өткен фестивальде ең ерекше қатысушылардың бірі – гуманоид-робот болды.

Ол тек қонақтардың назарын аударып қана қоймай, жугіру жарысына да қатысып, қашықтықты Илья Ильинмен бірге бағындырды.

Бұл шараның ұйымдастырушылары – қалалық спорт басқармасы мен Алматы ауданның әкімдігі.

Спорттық бұқаралық іс-шараларды өткізу дирекциясы басшысының орынбасары Ержігіт Өсербайдың айтуынша, онлайн тіркеу ашу туралы шешім тұрғындар тарапынан жоғары қызығушылық пен өтінімдердің көп түсуіне байланысты қабылданған.

– Бүгінгі іс-шарада әртүрлі жастағы қатысушылар бар. Мысалы, балалар арасында жарыс 6 жастан басталып жатыр, ал скандинавиялық жүріске 93 жастағы апамыз арнайы Көкшетаудан келіп қатысып жатыр. Отбасымен келгендер де көп, тіпті 9 баласы бар отбасы да бар. Жалпы бұқаралық жүгіруге 2000-нан астам адам тіркелді, скандинавиялық жүріске 200-ге жуық адам, балалар жарысына 250-ден астам бала қатысып жатыр. Мұндай іс-шаралар халықты біріктіреді, сондықтан алдағы уақытта да көптеп ұйымдастырылады, - деді Өсербай Ержігіт.

Ересектер арасында жүгіруге қатысқандардың бірі – Бекнұр Тәңірберген. Ол бағдарламашы болып жұмыс істегендіктен, көбіне компьютер алдында қозғалыссыз отыратынын айтты. Мұндай іс-шаралар денсаулық үшін аса пайдалы.

– Жарыс өте әдемі өтті. Өз басым спортшы емеспін, бірақ марафондарға жиі қатысып тұрамын. Келешекте бұйырса 10 және 21 шақырымда жүгіріп көруге тырысамын. Бүгін темпім 5 минут болды, жалпы 2,5 шақырым жүгірдім, жарақатқа байланысты сонымен шектелдім. Мен бағдарламашы болып жұмыс істеймін, онлайн форматта болған соң көбінесе үйде отырамын. Осындай керемет іс-шаралар көп болса екен, Астана әкімдігіне алғысым шексіз, - деді Бекнұр Таңірберген.

Бұған дейін Астанада жазғы жүгіру маусымы басталғанын жазған едік.