Qazaq24.com, Azh.KZ дереккөзінен алынған мәліметтерге сүйене отырып мәлімдеме жасады..
Отбасы мүшелері дәрілердің бір бөлігін өз қаражаттарына сатып алуға мәжбүр екенін, ал үздіксіз жүргізілуі тиіс кейбір процедуралардың демалыс күндері жасалмайтынын айтып шағымдануда.
Махамбет аудандық ауруханасы бұл пікірмен келіспейді. Медициналық мекеме өкілдерінің айтуынша, пациент онколог, кардиолог және жалпы тәжірибелік дәрігерлердің бақылауында, оған тиісті ем тағайындалған. Медбикелер күн сайын қызмет көрсетеді, бірақ үйде емдеу демалыс күндері міндетке кірмейді.
Махамбет ауданының тұрғыны Алмагүл Қожантаева ағасы, II топтағы мүгедек әрі онкологиялық науқас Қамат Қожантаевқа көрсетіліп жатқан медициналық көмектің сапасына қатысты шағымданды.
Отбасының айтуынша, тегін берілуі тиіс дәрілер уақытында жеткізілмей, оларды өз қаражаттарына сатып алуға мәжбүр. Отбасы шамамен 100 мың теңге көлемінде жеке клиникаға шығындалғанын айтады. Кейбір процедуралар демалыс күндері жасалмайды, ал бұл емді үзбеуді талап ететін жағдайда қауіпті.
— Ағамның жағдайы нашарлап барады, оған тұрақты ем қажет. Бірақ тегін берілуі тиіс дәрілер уақытында берілмейді, сондықтан біз оларды өз қаражатымызға сатып алуға мәжбүрміз, — дейді Алмагүл Қожантаева.
Қазіргі уақытта науқас үй жағдайында ем қабылдап жатыр. Отбасының басты шағымы — қажетті процедуралардың жүйелі түрде жүргізілмеуі.
Алмагүл Қожантаева: «Бізге демалыс күндері медбикелер келмейді дейді. Ал емді үзбей жүргізу керек болған адамға қалай болмақ?» — деп алаңдаушылық білдірді.
Отбасының айтуынша, медбикелер инъекция мен системаларды уақытында қоймайды, кейде мүлде кешігеді. Сонымен қатар, Атыраудан келген дәрігерлердің тағайындаулары толық орындалмайды деп есептейді. Ал аудандық ауруханада системаларды бес күннен артық қоюдан бас тартады деген шағым бар.
Отбасы мүшелері дәрігерлердің біліктілігіне де күмән келтірді: олардың айтуынша, бір маман бұрын дерматолог болып жұмыс істеген.
Ал Махамбет аудандық ауруханасы бұл пікірмен келіспейді. Медмекеме өкілдері пациент жергілікті онкологтың, кардиологтың және жалпы тәжірибелік дәрігерлердің бақылауында екенін, оған тиісті ем тағайындалғанын хабарлады. Сонымен қатар, жақында ол стационарлық ем қабылдағанын да атап өтті.
Аурухана мәліметінше, медбикелер күнделікті қызмет көрсетеді, бірақ үйде емдеу демалыс күндері міндетке кірмейді.
— Пациент тұрақты бақылауда, қажетті медициналық көмек көрсетілуде. Қолайсыздық үшін кешірім сұраймыз, — деп хабарлады аурухана өкілдері.
Пациенттің отбасы жағдай өзгермесе, мәселені жоғары деңгейге жеткізетінін ескертті. Олар облыстық денсаулық сақтау басқармасына, ҚР Денсаулық сақтау министрлігіне және басқа да уәкілетті органдарға ресми түрде шағымдануға дайын екенін мәлімдеді.
Айгүл МАНСУРОВА
Бүгін, 15:15