Sputnik.KZ парақшасынан алынған ақпаратқа сәйкес, Qazaq24.com хабарлайды..
АСТАНА, 23 сәуір – Sputnik. Мәжіліс Еуразиялық экономикалық одақ (ЕАЭО) пен үшінші тараптың кедендік транзитінің бірыңғай жүйесі туралы келісімді ратификациялады.
Құжатқа 2024 жылдың 26 желтоқсанында Санкт-Петербург қаласында қол қойылған.
"Құжат ЕАЭО мен үшінші тараптардың кедендік шекаралары арқылы тауар тасымалдауға қолайлы жағдай жасауды қамтамасыз ететін кедендік транзиттің бірыңғай жүйесін қалыптастыруды көздейді", - деп жазылған мәжілістің хабарламасында.
Жүйе мынадай негізгі элементтерді қамтиды:
электронды форматтағы бірыңғай транзиттік декларацияны қолдану;
кедендік алымдар мен салықтарды төлеуді қамтамасыз етудің бірыңғай тәртібін пайдалану;
тауарлардың бүкіл жүру жолында тасымалды қадағалау үшін навигациялық пломбаларды қолдану;
кеден органдары шешімдері мен кедендік бақылау нәтижелерін өзара тану.
Жүйені енгізу кедендік рәсімдерді стандарттауға және жеңілдетуге, транзит кезіндегі бизнестің уақыт пен қаражат шығынын азайтуға, ақпарат алмасуды жеделдетуге, жеткізілімдердің қауіпсіздігі мен жылдамдығын арттыруға мүмкіндік береді деп жоспарланып отыр.