Azh.KZ парақшасындағы ақпаратқа сәйкес, Qazaq24.com хабар таратты..
Қала өңсізденіп кеткендей. Үшінші күн қатарынан Атырау сұр тұманға оранып тұр. Жел көшелердің бойымен шаңды қуып, үйлердің қасбеттері көмескіленіп, көліктер күндіз шамдарын жағып жүр.
Көшелерде адам азайған. Көлік қозғалысы бәсеңдеген, аялдамаларда да халық сирек. Сыртқа шыққандар беттерін маскамен, шарфпен жауып жүр. Ауада шаң ауада сезіліп, киімге қонады.
Жекелеген аудандарда көріну қиындап, жүргізушілер жылдамдықты төмендетуге мәжбүр. Жаяу жүргіншілер желден көздерін сығырайтып кетіп барады.
Ал өзен бетіндегі мұзда адам көп. Балықшылар сұр аспан мен ызғарлы желге қарамастан орындарынан кетпей отыр.
Атырау облысының экология департаментінің дерегінше, бұл құбылыс Каспий теңізінің суы тартылған учаскелерімен байланысты болуы мүмкін. Мониторинг станциялары зиянды заттардың шекті мөлшерден асуын тіркемеген.
Тұрғындарға мүмкіндігінше сыртта аз болуға кеңес берілді. Босап қалған көшелерге қарағанда, көпшілік бұл кеңесті ұстанып үлгерген сияқты.
Айгүл МАНСУРОВА
Суреттерді түсірген автор
Бүгін, 11:23